Фарғона вилоятининг Олтиариқ туманида гиёҳванд моддаларни сотгани учун қўлга тушган 19 ёшли бола 8 йил муддатда қамалди. Бу ҳақда Олий суд хабар берди.
Жиноят ишлари бўйича Олтиариқ тумани суди маълумотларига кўра, судланувчи ёввойи ҳолда ўсган гиёҳвандлик ўсимлиги баргларини териб, уларни қуритиб, қайта ишлаб, “гашиш” гиёҳвандлик воситасини тайёрлаган.
Кейинчалик уни сотиш мақсадида яшаш хонадонида сақлаб келган. 2026 йилнинг январь ойида ҳуқуқни муҳофаза қилувчи органлар томонидан ўтказилган тезкор тадбир давомида у қарийб 11 грамм “гашиш”ни 2 миллион сўм эвазига сотаётган вақтда қўлга олинган. Тадбир жараёнида гиёҳвандлик воситаси ҳамда савдода фойдаланилган пул маблағлари ашёвий далил сифатида расмийлаштирилган.
Қайд этилишича, суд мажлисида иш бўйича тўпланган далиллар, гувоҳлар кўрсатмалари ва бошқа ҳужжатлар ҳар томонлама ўрганилган. Натижада судланувчининг айби ўз исботини топиб, унга қонунчиликда белгиланган тартибда жазо тайинланган.
Жиноят ишлари бўйича Олтиариқ туман судининг ҳукми билан судланувчи Жиноят кодексининг 273-моддаси (гиёҳвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисмида назарда тутилган жиноятни содир этганликда айбдор деб топилган.
Унга ушбу модда билан Жиноят кодексининг 57-моддаси (енгилроқ жазо тайинлаш) қўлланилиб, 8 йил муддатга озодликдан маҳрум қилиш тариқасидаги жазо тайинланган. Тайинланган жазо умумий тартибли колониаларда ўташлик белгиланган.
