27 октябрь куни Қозоғистон Президенти Қосим-Жомарт Тўқаев Россия Президенти Владимир Путин билан телефон орқали суҳбатлашди. Бу ҳақда Оқўрда матбуот хизмати хабар берди.
Қайд этилишича, суҳбат чоғида Қозоғистон Президентининг Россия Федерациясига бўлажак давлат ташрифига тайёргарлик масалалари муҳокама қилинган. Давлат раҳбарлари Москвада бўлиб ўтадиган музокараларнинг икки мамлакат ўртасидаги стратегик ҳамкорлик ва иттифоқчилик муносабатларини янада ривожлантиришдаги алоҳида аҳамиятини қайд этган.
Шунингдек, жаҳоннинг ҳозирги геосиёсий вазиятига оид айрим масалалар ҳам муҳокама қилинган.
Қайд этиш жоиз, Тўқаев аввалроқ Душанбеда ўтган “Марказий Осиё – Россия” саммити доирасида Владимир Путин билан учрашган. Ўша пайтда Тўқаевнинг жорий йилнинг 12 ноябрь куни Россияга ташриф буюриши режалаштирилгани маълум бўлган.
Шунингдек, 7 октябрь куни Тўқаев Путин билан телефон орқали мулоқот қилиб, уни туғилган куни билан табриклаган. Орадан бир ҳафта ўтиб, у яна Россия Президенти билан суҳбатлашиб, Москвага бўлажак ташрифи тафсилотларини муҳокама қилган.
