Бугун, 3 июль куни Яккасарой туманидаги “Beter best” МЧЖ қурилиш объектида канализация қувурига шикаст етиши оқибатида ер ўпирилиши ҳолати кузатилди. Бу ҳақда туман ҳокимлиги хабар берди.
Қайд этилишича, мазкур ҳудуддаги канализация тармоғида содир бўлган техник носозлик оқибатида қувурга шикаст етган. Оқибатда ер қопламасининг қисман чўкиши ва ўпирилиши кузатилган.
Билдирилишича, ҳодиса оқибатида жабрланганлар йўқ.
Туман ҳокимлигига кўра, айни вақтда вазият тўлиқ назоратга олинган. Воқеа жойида шаҳар масъул мутасаддилари, тегишли коммунал хизматлар ҳамда мутасадди ташкилотлар вакиллари томонидан тезкор ўрганиш ва тиклаш ишлари олиб борилмоқда.
Мутахассислар томонидан ҳодисанинг келиб чиқиш сабаблари аниқланиб, носозликни бартараф этиш, ҳудудни хавфсиз ҳолатга келтириш ҳамда бундай ҳолатларнинг такрорланишининг олдини олиш юзасидан зарур чоралар кўрилмоқда.
