Суданнинг Обайд шаҳрига 5 январь куни амалга оширилган дрон ҳужуми оқибатида 10 киши ҳалок бўлди. Тиббий манбаларнинг маълум қилишича, ҳалок бўлганларнинг етти нафари ёш болалардир. Бу ҳақда Arab News хабар берди.
Стратегик шаҳар қамал ҳолатида
Гувоҳларнинг сўзларига кўра, зарба Шимолий Кордофан вилоятининг маркази — Обайд марказидаги турар жой биносига берилган. Ҳозирда шаҳар Судан армияси назорати остида бўлиб, рақиб томон — “Тезкор ҳаракат кучлари” (ТYК) бир неча ойлардан буён уни қуршаб олишга уринмоқда.
Обайд минтақадаги энг муҳим шаҳар бўлиб, у пойтахт Хартумни мамлакат ғарбидаги Дарфур вилояти билан боғловчи стратегик чорраҳада жойлашган. Ўтган 2025-йилнинг октябрь ойида армия Дарфурдаги ўзининг сўнгги йирик позициясини бой берган эди.
Вазият тобора кескинлашмоқда
Дарфурдаги ғалабадан сўнг ТYК кучлари Кордофан орқали мамлакатнинг марказий йўлагини қайта эгаллашга интилмоқда. Улар ўз иттифоқчилари билан биргаликда армия назоратидаги бир қанча шаҳарлар атрофида қамални кучайтирган. Армия 2025-йилда ТYКнинг Обайддаги қамалини ёриб ўтишга муваффақ бўлган эди, бироқ шундан бери ҳарбийлаштирилган гуруҳ шаҳарни қайта қуршаб олишга ҳаракат қилмоқда.
Сўнгги марта якшанба, 4 январь, куни амалга оширилган дрон ҳужумлари шаҳарда электр таъминоти узилишига сабаб бўлганди, бироқ қурбонлар ҳақида хабар берилмаган. Ўтган ҳафтада армия билан иттифоқдош қуролли гуруҳлар Обайддан жанубдаги бир қанча шаҳарларни қайта эгаллаганини маълум қилган. Бу жанубий Кордофаннинг қамал қилинган Диллинг шаҳри билан алоқа йўлини очишга имкон бериши айтилмоқда.
Дунёдаги энг йирик гуманитар инқирози
2023-йилнинг апрель ойидан буён давом этаётган Судан уруши ўн минглаб одамларнинг ҳаётига зомин бўлди. БМТ томонидан “ваҳшийликлар уруши” деб таърифланган ушбу низо дунёдаги энг йирик очарчилик ва кўчиш инқирозини келтириб чиқарди.
Сўнгги маълумотларга кўра, 12 миллиондан ортиқ одам қочқинга айланган. Минтақадаги юз минглаб одамлар оммавий очарчилик хавфи остида қолмоқда. 2023-йилда бошланган ушбу фуқаролар уруши ҳозиргача ўн минглаб одамларни ҳаётдан кўз юмишига сабаб бўлган.
