Бугун, 22 апрель куни Ҳиндистонда пиротехника ишлаб чиқариш корхонасида навбатдаги бахтсиз ҳодиса юз берди – бу галги портлаш оқибатида камида 13 киши ҳаётдан кўз юмди. Бу ҳақда BBC хабар берди.
Нашрнинг ёзишича, портлаш Ҳиндистон жанубидаги Керала штатининг Трисур округида жойлашган пиротехника заводида содир бўлган. Қайд этилишича, ишчилар Трисур Пурам фестивалининг асосий томошаси иштирокчиларидан бири бўлган Тирувамбади ибодатхонаси учун мушаклар тайёрлаётган бўлган.
Расмий шахсларнинг маълум қилишича, фавқулодда ҳодиса оқибатида камида 13 киши ҳалок бўлган. Яна бир неча киши жароҳатланган, улардан беш нафарининг аҳволи ўта оғир деб баҳоланмоқда.
Дастлабки маълумотларга кўра, мушакларни йиғиш жараёнида 40 га яқин ишчи қатнашган – айнан шунча одам учун овқат тайёрлаб қўйилган бўлган. Таъкидланишича, биринчи портлашдан кейин яна бир нечта кетма-кет портлашлар содир бўлган ва бу қутқарув ишларини секинлаштирган. Бундан ташқари, мушаклар шоли далалари яқинидаги вақтинчалик бостирмаларда ишлаб чиқарилган, бу эса фавқулодда хизматлар техникаларининг етиб боришини қийинлаштирган.
Нашрнинг ёзишича, портлаш кучи бир неча километр узоқликда ҳам сезилган ва атрофдаги уйларга шикаст етган. Айрим аҳоли эса содир бўлган воқеани зилзила деб ўйлаган.
Муниципалитет раиси портлашни кундузи ҳаво ҳароратининг ҳаддан ташқари исиб кетгани билан изоҳлаган, бироқ расмийлар сабаб ҳозирча номаълумлигини билдирган. Ҳодиса тафсилотларини ўрганиш ва айбдорларни аниқлаш мақсадида суд текшируви тайинланган.
