Францияда 18 ёшли Клемент бошчилигидаги жиноий гуруҳ бир қатор бизнес раҳбарлари, рэперлар, шунингдек, Франция миллий терма жамоаси ва “Реал Мадрид” ҳужумчиси Килиан Мбаппени ўғирлашни режалаштирган. Бу ҳақда “Le Parisien” нашри хабар берди.
Манба маълумотларига кўра, жиноий гуруҳ томонидан жами 26 нафар шахсга нисбатан ноқонуний ҳаракатларни амалга ошириш режалаштирилган.
Жорий йилнинг 21 август куни Клемент ва унинг шериги апрель ойида содир этилган соатсозлик дўкони талончилиги билан боғлиқ ҳолатда расман айбланган. Мусодара қилинган телефонлардаги маълумотларни ўрганиш натижасида Клемент 11 апрелдан 19 августгача яна бир нечта талончилик ва одам ўғирлаш жиноятларини режалаштиргани аниқланган.
Клемент ҳибсга олинган. Унинг эҳтимолий шериги эса қўйиб юборилган бўлса-да, суд назорати остида қолдирилган.
Маълумот учун, 27 ёшли Килиан Мбаппе 2024 йилдан буён “Реал Мадрид” сафида тўп тепиб келмоқда. У 2024-2025 йилги мавсумда жамоаси билан Испания Суперкубоги ва Қитъалараро кубокни қўлга киритган.
Мбаппе Франция миллий терма жамоаси билан 2018 йилда Россияда бўлиб ўтган жаҳон чемпионати ғолиби бўлган. Шунингдек, у 2022 йил Қатарда ўтказилган жаҳон чемпионатида кумуш медални қўлга киритган.
Франциялик ҳужумчи Жаҳон чемпионатлари тарихида энг кўп гол урган футболчилардан бири ҳисобланади.
