Бухорода талаба қизни Туркиянинг Истанбул шаҳрига шаҳвоний эксплуатация учун юбормоқчи бўлган жиноий гуруҳ Самарқанд халқаро аэропортида ушланди. Бу ҳақда Ички ишлар вазирлиги хабар берди.
Қайд этилишича, жорий йилнинг 2 март куни тонги соат 04:00 ларда Самарқанд халқаро аэропортида ўтказилган тезкор тадбирда Туркия давлати фуқароси ҳамда унинг ўзбекистонлик 3 нафар жиноий шериклардан иборат гуруҳ талаба қизни шаҳвоний эксплуатация қилиш учун Истанбулга жўнатмоқчи бўлган.
Маълум бўлишича, қиз Бухоро вилоятидаги олийгоҳлардан бирининг биринчи босқичида таҳсил олаётган бўлган.
Қонунбузарлар Самарқанд халқаро аэропортида рўйхатдан ўтказаётган пайтда ҳуқуқни муҳофаза қилувчи орган ходимлари томонидан жиноят устида ушланган. Улардан хорижга чиқиш паспортлари ва авиачипталар ашёвий далил сифатида олинган.
Мазкур ҳолат юзасидан жиноий гуруҳга нисбатан Жиноят кодексининг 135-моддаси (одам савдоси) 2-қисми “д” ва “к” бандлари билан жиноят иши қўзғатилиб, дастлабки тергов ҳаракатлари бошланган.
