Тошкент шаҳрида кекса ёшли аёлни уриб, сумкаси билан бирга 12 млн сўм пулини ўғирлаган 3 нафар эркак қўлга олинди. Бу ҳақда пойтахт Ички ишлар бош бошқармаси хабар берди.
Қайд этилишича, Тошкент шаҳар Бектемир тумани Ички ишлар органлари фаолиятини мувофиқлаштириш бошқармаси навбатчилик қисмига фуқаролардан бири босқинчилик қурбонига айлангани бўйича мурожаат тушган. Маълум бўлишича, 3 нафар эркак ўзаро тил бириктириб, жабрланувчи аёлни урган ва тан жароҳати етказиб, унинг 12 миллион сўм пули ҳамда бошқа мол-мулкларини эгаллаб, воқеа жойидан яширинган.
Ушбу босқинчиликни содир этганликда гумонланиб, 3 нафар шахс қўлга олинган ва далилий ашёлар процессуал тартибда расмийлаштирилиб, тергов бўлимига топширилган.
“Пулларни ҳисоблаганимизда 12 миллион сўм чиқди. Иккаламиз 6 миллион сўмдан бўлишдик. Шу қилган ишларимдан мингдан минг пушаймонман. Шу онажондан ҳам мингдан минг узр сўрайман”, дейди гумонланувчилардан бири.
Жорий йилнинг 23 март куни мазкур ҳолат юзасидан Жиноят кодексининг 164-моддаси (босқинчилик) 2-қисми “б” банди билан айблов эълон қилиниб, уларга нисбатан “қамоққа олиш” тарзидаги эҳтиёт чораси танланган. Ҳозирда дастлабки тергов ҳаракатлари давом эттирилмоқда.
Маълумот учун, босқинчилик, яъни ўзганинг мол-мулкини талон-торож қилиш мақсадида ҳужум қилиб, ҳаёт ёки соғлиқ учун хавфли бўлган зўрлик ишлатиб, ёхуд шундай зўрлик ишлатиш билан қўрқитиб содир этилган жиноят учун Жиноят кодексининг 164-моддасига биноан 20 йилгача озодликдан маҳрум қилиш жазоси белгиланган.
