Ўзбекистон миллий жамоаси ва Англиянинг “Манчестер Сити” клуби ҳимоячиси Абдуқодир Ҳусанов Осиёнинг энг қиммат футболчиларидан бирига айланди.
Айни пайтда 21 ёшли футболчининг бозор қиймати 35 миллион еврога тенг. Октябрь ойидаги янгиланишдан сўнг эса “Бавария” ҳимоячиси Ким Мин Жаэнинг нархи 40 миллион евродан 32 миллион еврога тушган. Худди шунингдек, “Брайтон” вакили Каору Митомонинг қиймати ҳам 40 миллион евродан 35 миллион еврога камайган. Натижада, Абдуқодир Ҳусанов Митомо билан биргаликда Осиё қитъасининг энг қиммат футболчиларидан бири бўлиб турибди.
“Реал Сосьедад” футболчиси Такефуса Кубо 30 миллион евро билан 4-ўринни эгаллаб турган бўлса, Каишу Сано кучли бешликка якун ясаган — 25 миллион евро.
Осиёнинг энг қиммат футболчилари (топ-10)
- Абдуқодир Ҳусанов — “Манчестер Сити” 35 миллион евро;
- Каору Митомо — “Брайтон” 35 миллион евро (олдинги нархи 40 млн евро);
- Ким Мин Жаэ — “Бавария” 32 млн евро (олдинги нархи 40 млн евро);
- Такефуса Кубо — “Реал Сосьедад” 30 млн евро;
- Каишу Сано — “Майнц” 25 млн евро (олдинги нархи 20 млн евро);
- Ле Кан Ин — “ПСЖ” 25 млн евро;
- Рицу Доан — “Фрайбург” 25 млн евро;
- Зион Сузуку — “Парма” 20 млн евро;
- Сон Ҳён Мин — “Лос Анжелес” 20 млн евро;
- Ҳироки Ито — “Бавария” 18 млн евро (олдинги нархи 25 млн евро).
Эслатиб ўтамиз, Ҳусанов 2025 йил январь ойида “Ланс” клубидан “Манчестер Сити”га ўтган эди. У инглиз клуби билан 4 йиллик шартнома имзолаган, трансфер қиймати эса 40 миллион еврони ташкил этган.
