Президентнинг Қорақалпоғистонда тузни қайта ишлашни ривожлантиришга қаратилган қарори қабул қилинди. Бу ҳақда Адлия вазирлиги хабар қилди.
Қайд этилишича, “Барсакелмес” туз конида келаси йилда камида 50 миллион долларлик инвестиция ўзлаштирилади ҳамда 2026–2030 йилларда жами 200 миллион доллар миқдоридаги инвестициялар жалб қилинади.
Қўнғирот туманидаги ушбу кон ҳудудида чегараларда тузни қайта ишлашга ихтисослаштирилган Kungrad Salt Free Zone саноат зонаси ташкил этилади.
Шу йил ва 2026 йилларда 50 гектар ер участкасида инвестиция лойиҳалари амалга оширилади, келгусида заруратдан келиб чиқиб, саноат зонаси ҳудуди 200 гектаргача кенгайтириб борилади.
Бундан ташқари, саноат зонасида инвестиция лойиҳаларини амалга оширишни бошлаган тадбиркорларга 5 йил муддатга “Нукус” эркин иқтисодий зонаси иштирокчиси мақоми берилади.
