Украина Ташқи ишлар вазирлиги Финляндия ҳаво ҳудудига дронлар кириб бориши билан боғлиқ ҳодиса юзасидан Хелсинкидан узр сўради ва мамлакат билан алоқада бўлиб турганини маълум қилди. Бу ҳақда вазирлик расмий вакили Георгий Тихийга таяниб “Украинская правда” хабар берди.
Тихийнинг таъкидлашича, Украина 29 март куни Финляндиянинг Коувола шаҳри ҳаво ҳудудини бузган иккита дрон билан боғлиқ вазиятга ойдинлик киритиш учун барча зарур маълумотларни тақдим этмоқда.
“Шуни қатъий айта оламизки, ҳеч қандай ҳолатда Украина дронлари Финляндия томон йўналтирилмаган. Бунга энг катта эҳтимол билан Россиянинг электрон кураш тизимлари воситасида дронларга халақит бергани сабаб бўлган. Биз ушбу ҳодиса юзасидан Финляндия томонидан аллақачон узр сўрадик”, деди Тихий.
Украина ТИВ вакилининг қўшимча қилишича, вазирлик Финляндиянинг ушбу ҳодиса ва минтақадаги кенгроқ хавфсизлик муаммоларининг асосий сабаби Россиянинг Украинага қарши тажовузи экани ҳақидаги фикрига қўшилади.
Финляндия Ҳарбий-ҳаво кучлари 29 март куни тушдан кейин мамлакат ҳаво сарҳадларини бузган объектлардан бирини Украинанинг Ан-196 “Лютий” дрони сифатида идентификация қилган эди.
Финляндия бош вазири Петтери Орпо мамлакат ҳудудига қулаган дронлар катта эҳтимол билан Украинага тегишли эканини айтган. Унинг тушунтиришича, Украина Финляндия билан чегарадош бўлган Россиянинг Ленинград вилоятидаги нишонларга ҳужум уюштирган ва аппаратлар шу сабабли адашиб қолган бўлиши мумкин.
Мазкур воқеа ортидан Финляндия парламентининг Мудофаа қўмитаси 31 март куни навбатдан ташқари йиғилиш ўтказади. Унда жорий мудофаа масалалари, жумладан, дронлар билан боғлиқ ҳодисалар муҳокама қилинади.
