Бугун, 5 майга ўтар кечаси Россия Украинанинг газ ишлаб чиқариш иншоотларига ракета ва дронлар билан зарба бериб, жами беш кишининг ҳалок бўлишига сабаб бўлди. Бу ҳақда Украина расмийлари маълум қилди.
Украинанинг “Нафтогаз” давлат энергетика компанияси бош директори Сергий Корецкийнинг айтишича, Россия кучлари Полтава ва Харьков вилоятларидаги газ ишлаб чиқариш объектларига зарба берган. Унинг сўзларига кўра, “Нафтогаз”нинг уч нафар ходими ва икки нафар фавқулодда хизмат қутқарувчиси ҳалок бўлган, 37 киши эса яраланган. “Нафтогаз” иншоотлари эса дронлар ва баллистик ракеталар иштирок этган ҳужум оқибатида жиддий зарар кўрган ва ишлаб чиқаришда йўқотишлар юзага келган.
Бу ҳолат Россия Президенти Владимир Путин кеча, 4 май куни қисқа муддатли ўт очишни тўхтатишни эълон қилганидан сўнг кузатилган. Украина Президенти Владимир Зеленский эса ҳужумларни қоралаб баёнот берган.
“Ҳар куни бундай ракета ва дрон ҳужумларини амалга ошириб туриб, пропаганда тадбирларини ўтказиш учун ўт очишни тўхтатишни сўраш мутлақо нотўғри”, деган Зеленский.
Президент, шунингдек, Россия кучлари Днепропетровск вилоятидаги муҳим инфратузилмага ҳам зарба берганини, уч киши яраланганини ва минглаб оилалар электр таъминотисиз қолганини маълум қилган.
