Ўзбекистон Республикаси Президенти Шавкат Мирзиёев Грузия Бош вазири Ираклий Кобахидзенинг таклифига биноан 2-3 июль кунлари давлат ташрифи билан ушбу мамлакатда бўлади. Бу ҳақда Президент матбуот хизмати хабар берди.
Маълум қилинишича, Тбилиси шаҳрида Грузия Президенти Михаил Кавелашвили ҳамда Бош вазири Ираклий Кобахидзе билан музокаралар ўтказилиши кўзда тутилган. Музокаралар кун тартибидан Ўзбекистон – Грузия дўстлик ва кўп қиррали ҳамкорлик муносабатларини янада ривожлантириш масалалари ўрин олган.
Сиёсий мулоқотни мустаҳкамлаш, парламентлараро ва ҳудудлараро алоқаларни ривожлантириш, савдо-иқтисодий ҳамкорликни кенгайтириш ҳамда маданий-гуманитар алмашинувларни фаоллаштиришнинг амалий жиҳатлари атрофлича муҳокама қилинади.
Қайд этилишича, томонлар саноат, фармацевтика, кимё, қишлоқ хўжалиги, туризм, энергетика ва ахборот технологиялари соҳаларида кооперация лойиҳаларини илгари суришга алоҳида эътибор қаратадилар.
Шу билан бирга, транспорт-логистика соҳасида ҳамкорлик қилиш ҳамда маҳсулотлар экспорти географиясини кенгайтириш учун қўшимча имкониятлар яратиш масалалари диққат марказида бўлади. Етакчилар халқаро ва минтақавий аҳамиятга молик долзарб мавзулар юзасидан ҳам фикр алмашадилар.
Саммит якунлари бўйича ҳамкорликнинг турли йўналишларини қамраб оладиган икки томонлама ҳужжатларнинг салмоқли тўпламини имзолаш режалаштирилган.
