Бугун, 12 декабрь куни Ўзбекистон Республикаси Президенти Шавкат Мирзиёевнинг Туркманистоннинг Ашхобод шаҳрига амалий ташрифи якунланди. Бу ҳақда Ўзбекистон етакчисининг матбуот хизмати хабар берди.
Ўзбекистон раҳбари Туркманистоннинг доимий бетарафлигининг 30 йиллиги, Халқаро бетарафлик куни ва 2025 йил “Халқаро тинчлик ва ишонч йили” деб эълон қилинганига бағишланган халқаро форумда иштирок этди ҳамда нутқ сўзлади.
Шунингдек, Шавкат Мирзиёев Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов ва Президент Сердар Бердимуҳамедов билан музокаралар ўтказди.
Делегациялар раҳбарлари ташриф доирасида Ашхободдаги янгиланган Бетарафлик мажмуасига ҳам ташриф буюрди.
Тадбирлар якунлангач, Ўзбекистон Республикаси Президентини Ашхобод халқаро аэропортида Туркманистон Вазирлар Маҳкамаси Раисининг ўринбосари Хожамират Гелдимирадов ва бошқа расмий шахслар кузатиб қўйган. Давлат раҳбари Тошкентга жўнаб кетган.
