Саудия Арабистонининг “Ал-Иттиҳод” клуби президенти Анмар Аль-Хаили Лионель Мессини ўз жамоасида кўришни орзу қилаётганини ва бунга эришиш учун молиявий чекловларсиз ҳаракат қилишга ва умрбод шартнома таклиф қилишга тайёрлигини маълум қилди. Бу ҳақда “The Footy Section” хабар берди.
Аргентиналик футбол юлдузи “Интер Майами” билан 2028 йилгача мўлжалланган шартномага эга бўлишига қарамай, агар у келажакда янги клуб танлашни истаса, “Ал-Иттиҳод” уни очиқ қўл билан кутиб олишга тайёр.
Аль-Ҳаилийнинг сўзларига кўра, клуб замонавий футболнинг энг буюк ўйинчиси билан музокара олиб боришда барча имкониятларни ишга солади. “Ал-Иттиҳод” Мессига умрбод шартномагача бўлган исталган муддатга шартнома таклиф қилишга тайёр ва унинг маошини белгилашда тўлиқ эркинлик беради.
“Мен рақамларга қизиқмайман. Мен фақат битта нарсани хоҳлайман: Месси “Ал-Иттиҳод” футболкасини кийиши. У тарихдаги энг буюк ўйинчи”, дейди клуб раҳбари.
Лионель Месси 2023 йил ёзидан бери “Интер Майами” сафида ўйнаб келмоқда ва MLS’нинг асосий юлдузи ҳисобланади, аммо агар афсона қитъаларни ўзгартиришга қарор қилса, Саудия Арабистони буни амалга оширишга тайёр.
