АҚШ президенти Дональд Трамп 13–15 май кунлари расмий ташриф билан Хитойда бўлади. У ХХР раиси Си Цзиньпин билан учрашувга Илон Маскни ҳам олиб кетмоқчи. Бу ҳақда Оқ уй вакилига таяниб Bloomberg хабар берди.
Трамп ушбу сафарда унга ҳамроҳлик қилиши учун Tesla раҳбари Илон Маск, Apple раҳбари Тим Кук, Boeing раҳбари Келли Ортберг ва бошқа йирик компанияларнинг топ менежерларини ҳам таклиф қилган. Делегация таркибидан, шунингдек, Goldman Sachs банки раҳбари Девид Соломон, BlackRock инвестиция компанияси раҳбари Ларри Финк, Blackstone раҳбари Стивен Шварсман, Citigroup бош директори Жейн Фрэйзер ва Meta вакили Дина Пауэлл Маккормик ҳам жой олган.
АҚШ президенти учрашув давомида янги савдо ва инвестиция битимлари бўйича келишувга эришишни режалаштирмоқда. Делегация таркибига молия, технология, авиация ва қишлоқ хўжалиги соҳалари вакиллари киритилгани бежиз эмас.
Хусусан, Boeing раҳбари ташриф давомида Хитойга 500 та Boeing 737 Мах самолётини етказиб бериш бўйича шартнома имзоланганини эълон қилиши кутилмоқда. Бу компания тарихидаги энг йирик битимлардан бири бўлиши мумкин. Шу билан бирга, делегация рўйхатида Nvidia раҳбари Женсен Хуаннинг йўқлиги эътиборни тортган. Экспертлар бу ҳолат компаниянинг Хитойга сунъий интеллект чипларини экспорт қилиш учун рухсат олиш жараёнини қийинлаштириши мумкинлигини айтмоқда.
Илон Маскнинг ушбу сафарда иштирок этиши у ва Трамп ўртасидаги 2025 йилги можародан сўнг муносабатлар тикланаётгани белгиси сифатида кўрилмоқда. Аввалроқ миллиардер президент маъмуриятида федерал аппаратни қисқартириш дастурини назорат қилган, бироқ кейинчалик улар ўртасида келишмовчилик юзага келган эди.
