Наманган шаҳрида электр энергиясидан ноқонуний фойдаланиб, таъминот корхонасига йирик миқдорда зарар етказган хусусий корхона аниқланди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси хабар берди.
Маълум қилинишича, Бош прокуратура штаби томонидан Наманган шаҳрида назорат тадбири ўтказилган. Тадбир давомида “С.Ф.” хусусий корхонасига қарашли нотурар бинонинг электр қурилмалари ҳисоблагичдан ташқари тарзда тармоққа ўзбошимчалик билан улангани маълум бўлган.
Ўрганишлар давомида ушбу қоидабузарлик натижасида электр таъминоти корхонасига жами 11 миллиард 80 миллион сўмлик зарар етказилгани аниқланган.
Ўзбекистонда жорий йил илк уч ойининг ўзида 196 млрд сўмлик газ ва электр энергияси талон-торож қилинган. Назорат тадбирларида энергия ресурсларидан ноқонуний фойдаланиш бўйича 885 та ҳолат аниқланган.
