Жиззахда 2025 йил 10 ойи давомида қанча ноҳақ ишдан олинган фуқаро фаолиятига қайта тиклангани ва иш ҳақларини ундириш бўйича амалга оширилган ишлар очиқланди. Бу ҳақда Бош прокуратура матбуот хизмати хабар қилган.
Қайд этилишича, жорий йилнинг ўтган даврида ижро ҳаракатлари жараёнида, ноқонуний равишда ишдан бўшатилган 31 нафар ходим лавозимига қайта тикланган.
Шу билан бирга, 482 та ижро ҳужжатларига асосан фуқаролар фойдасига жами 2,7 миллиард сўм ўз вақтида тўлаб берилмаган иш ҳақлари ундирилиши таъминланган.
Бунга тегишли суднинг ижро ҳужжатига асосан Жиззах шаҳридаги тўқимачилик корхонасидан 250 нафар ишчи ходимлари фойдасига ўз вақтида тўлаб берилмаган 946,6 миллион сўм иш ҳақининг олиб берилгани мисол қилиб кўрсатилди.
