Андижон шаҳрида кўп қаватли уй ҳудудида жанжаллашган 7 нафар аёлга беш суткадан маъмурий қамоқ жазоси тайинланди. Бу ҳақда вилоят ИИБ матбуот хизмати хабар берди.
Маълум қилинишича, 30 июль куни соат 12:30 ларда кўп қаватли уй ҳудудида бир гуруҳ аёллар ўртасида содир бўлган жанжал юзасидан 102 қисқа рақами орқали ички ишлар органларига хабар келиб тушган. Хабарга асосан воқеа жойига етиб борган ички ишлар ходимлари томонидан фуқаролар жамоат тартибини қўпол равишда бузиб, ўзаро бақир-чақир қилиб жанжаллашаётгани ҳамда атрофдаги фуқароларнинг осойишталигини бузгани аниқланган.
Шундан сўнг ҳолатга ҳуқуқий баҳо бериш ва ҳужжатларни расмийлаштириш мақсадида улар ички ишлар биносига олиб келинган. Бироқ бу ерда ҳам айрим фуқаролар ходимларнинг қонуний талабларига бўйсунмасдан, ўзаро ҳақоратли ва уятли сўзлар билан жанжални давом эттирган.
Терговга қадар текширув давомида аниқланишича, аёллар ўртасидаги жанжалнинг келиб чиқишига ижтимоий тармоқ, Instagram орқали бошланган ўзаро ҳақоратлар сабаб бўлгани. Фуқароларнинг ҳаракатларида Маъмурий жавобгарлик тўғрисидаги кодекснинг 183-моддаси (майда безорилик) ҳамда 194-моддасида (ички ишлар органлари ходимининг қонуний талабларини бажармаслик) назарда тутилган ҳуқуқбузарлик аломатлари мавжудлиги сабабли тўпланган ҳужжатлар жиноят ишлари бўйича Андижон шаҳар судига юборилган.
Жиноят ишлари бўйича Андижон шаҳар судининг қарорига кўра, мазкур ҳуқуқбузарликларни содир этган етти нафар аёл айбдор деб топилиб, уларнинг ҳар бирига нисбатан беш суткадан маъмурий қамоқ жазоси тайинланди.
