Ўзбекистон келгуси 10 йилда Американинг муҳим соҳаларига 100 миллиард доллардан зиёд инвестиция киритади ва харидларни амалга оширади. Бу ҳақда АҚШ президенти Дональд Трамп ўзининг Truth Social ижтимоий тармоғида маълум қилди.
Трамп Ўзбекистон билан эришилган савдо-иқтисодий битим ҳақида маълумот берди.
More stories“АҚШ ва Ўзбекистон ўртасидаги ажойиб савдо-иқтисодий битимни эълон қилишдан ғоят хурсандман. Келгуси уч йил мобайнида Ўзбекистон Американинг муҳим соҳалари, жумладан, муҳим минераллар, авиация, автомобиль қисмлари, инфратузилма, қишлоқ хўжалиги, энергетика ва кимё саноати, ахборот технологиялари ҳамда бошқа тармоқларга деярли 35 миллиард доллар, кейинги 10 йил ичида эса 100 миллиард доллардан зиёд инвестиция киритади ва харидларни амалга оширади.
Ўзбекистоннинг юксак ҳурматга сазовор президенти Шавкат Мирзиёевга миннатдорлик билдирмоқчиман. Мамлакатларимиз ўртасидаги узоқ ва самарали ҳамкорликни давом эттиришни интиқлик билан кутамиз!”, деб ёзди Трамп.
Ўзбекистон ва АҚШ президентлари музокаралари
Шавкат Мирзиёев 6 ноябрь куни Вашингтон шаҳрига амалий ташрифи доирасида Оқ уйда АҚШ президенти Дональд Трамп билан учрашди. Президентлар дастлаб Оқ уйнинг Фахрий меҳмонлар китобида қайд ёзиб қолдирди, сўнг Овал хонада музокара ўтказди.
Ўзбекистон билан АҚШ ўртасидаги стратегик шериклик муносабатларини янада ривожлантириш, сиёсий мулоқотни мустаҳкамлаш, савдо-иқтисодий, инвестициявий ва маданий-гуманитар ҳамкорликни кенгайтириш масалалари кўриб чиқилди.
Глобал ва минтақавий аҳамиятга молик долзарб масалалар, шу жумладан, “C5+1” форматида Марказий Осиё ва АҚШ ўртасидаги ҳамкорликни чуқурлаштириш юзасидан фикр алмашилди.
Ўзбекистон раҳбари Трампни ички ва ташқи сиёсатдаги юксак муваффақиятлари билан самимий табриклади. Унинг ўткир халқаро ва минтақавий можароларни тинч йўл билан ҳал этиш борасида қўшаётган ҳиссаси ва саъй-ҳаракатлари алоҳида қайд этилди. Трамп шу кунларда Ўзбекистон етакчиси АҚШ ҳукумати вакиллари, йирик компаниялари ва молиявий институтлари раҳбарлари билан учрашув ва музокаралар ўтказганини олқишлади. Учрашув якунида Шавкат Мирзиёев АҚШ етакчисини ўзи учун қулай муддатда Ўзбекистонга расмий ташриф билан келишга таклиф этди.
