2010 йилда туғилган қиз билан жинсий алоқа қилган Андижон вилоят ИИБ вояга етмаганларга ижтимоий-ҳуқуқий ёрдам кўрсатиш маркази инспектори қамоққа олинди. Бу ҳақда вилоят Прокуратураси хабар берди.
Аниқланишича, Қўрғонтепа тумани прокуратураси томонидан 2010 йилда туғилган вояга етмаган У.М. жорий йилнинг 3 июнь куни яшаш хонадонидан номаълум томонга чиқиб кетиб, қайтиб келмагани юзасидан терговга қадар текширув ҳаракатлари ўтказилган.
Терговга қадар текширув давомида Андижон вилоят ИИБ вояга етмаганларга ижтимоий-ҳуқуқий ёрдам кўрсатиш маркази инспектори-ижтимоий ходими лавозимида ишлаган С.Б. вояга етмаган У.М. ни Андижон шаҳарда жойлашган кўп қаватли уйга олиб бориб, у билан жинсий алоқа қилгани аниқланган.
Мазкур ҳолат юзасидан жорий йилнинг 4 июнь куни С.Б. га нисбатан Жиноят кодексининг 128-моддаси (ўн олти ёшга тўлмаган шахс билан жинсий алоқа қилиш) 3-қисми “в” банди билан жиноят иши қўзғатилиб, суднинг тегишли ажрими билан гумонланувчи тариқасида “қамоқ” эҳтиёт чораси қўлланилган.
Ҳозирда мазкур ҳолат юзасидан Қўрғонтепа туман прокуратураси томонидан дастлабки тергов ҳаракатлари олиб борилмоқда. Тергов ҳаракатларининг бориши вилоят прокуратураси томонидан назоратга олинган бўлиб, якунида қонуний қарор қабул қилиниши таъминланади.
“Эзгулик” инсон ҳуқуқлари жамияти раиси Абдураҳмон Ташановнинг ёзишича, гумонланувчи 2004 йилда Афинада бўлиб ўтган Олимпиада ўйинларида бокс бўйича қатнашиб, бронза медалига эга чиққан таниқли боксчи.
“Андижонда вилоят ИИБ майори, 41 яшар таниқли спортчининг қамоққа олингани хабари келди. Андижон вилояти ИИБнинг вояга етмаганлар масалалари бўйича нозири бўлган бу йигит 2004 йилги Олимпиаданинг бокс бўйича бронза медали соҳиби эди”, деб ёзади у.
