3 ноябрь куни Ўзбекистон Республикаси Президенти Шавкат Мирзиёев Қатар Амири Шайх Тамим бин Ҳамад Ол Сонийнинг таклифига биноан амалий ташриф билан Доҳа шаҳрига борди. Бу ҳақда Президент матбуот хизмати хабар берди.
Қайд этилишича, Мирзиёевни Қатар Бош вазири ўринбосари, Мудофаа ишлари бўйича давлат вазири Шайх Сауд бин Абдураҳмон Ол Соний ва бошқа расмий шахслар кутиб олган.
Шайх Ҳамад номидаги халқаро аэропортда олий мартабали меҳмон шарафига фахрий қоровул саф тортган, икки мамлакатнинг давлат байроқлари кўтарилган.
Ташриф дастурига мувофиқ, Ўзбекистон Президенти , 4 ноябрь куни Ижтимоий ривожланиш бўйича иккинчи Жаҳон саммитида иштирок этади.
“Давлатимиз раҳбари камбағалликни қисқартириш, аҳоли бандлигини таъминлаш, жамиятларнинг барқарорлиги, ижтимоий адолатли ва инклюзивлигини ошириш, таълим олиш имкониятларини кенгайтириш, иқлим ўзгаришига мослашиш ҳамда бошқа йўналишларда қатор ташаббусларни илгари суриши кутилмоқда”, дейилади хабарда.
Билдирилишича, саммит доирасида олий даражадаги музокаралар ўтказилиши ҳам кўзда тутилган.
