Ўзбекистонда қимматбаҳо металлар билан операцияларни амалга ошириш тартиби белгиланди. Бу ҳақда Адлия вазирлиги хабар қилди.
Эндиликда жисмоний ва юридик шахслар ўлчовли олтин қуймаларни банк мобил иловаси орқали сотиб олиши ва қайта сотиши мумкин. Шунингдек, банклар қуймаларни олди-сотди шартнома асосида Марказий банкдан харид қилиб, уларни сотиш бўйича мустақил нарх белгилаши мумкин.
Бундан ташқари, жисмоний ва юридик шахслар олтин ёки кумушнинг граммда ҳисобланувчи рақамли кўринишини ҳам мобил илова орқали реал вақтда сотиб олишлари ёки сотишлари мумкин бўлади. Бу орқали ўлчовли олтин қуймаларни онлайн харид қилиш имкони яратилади.
Бунда нархлар Лондон қимматбаҳо металлар бозори уюшмасининг ҳар кунги фиксинги асосида белгиланади.
Барча операциялар банк тизимлари орқали идентификация ва аудентификация билан тасдиқланади ҳамда нархлар банкларнинг расмий сайти, мобил иловаси ва ижтимоий саҳифаларида доимий янгиланиб боради.
