Ўзбекистонда хитойлик кардиожарроҳлар томонидан 2026-йилда 500 нафар юрак нуқсони бўлган бемор болада юқори технологик операциялар ўтказилиши мумкин. Бу таклиф соғлиқни сақлаш вазири Асилбек Худаяров ва Хитойнинг Ўзбекистондаги элчиси Юй Сзюн билан учрашувда кўриб чиқилди.
Вазирлик матбуот хизматининг хабар қилишича, бу амалиётлар Болалар миллий тиббиёт маркази, Республика ихтисослаштирилган хирургия илмий-амалий тиббиёт маркази ҳамда Тошкент давлат тиббиёт университети болалар кўп тармоқли клиникасида бажарилиши кўзда тутилган.
Учрашувда икки мамлакат раҳбарлари саъй-ҳаракати билан ўзаро стратегик ва дўстона алоқалар ривожланаётгани, хусусан, ўтган йил 1 сентябрда Хитойнинг Тянсзин шаҳрида ўтказилган ШҲТ саммити доирасида икки давлат соғлиқни сақлаш вазирликлари ўртасида тиббий хизмат кўрсатиш бўйича имзоланган ҳукуматлараро битим ҳамкорликни янада мустаҳкамлашда алоҳида аҳамият касб этаётгани қайд этилди.
Мулоқотда Республика суд-тиббий экспертиза илмий-амалий марказининг моддий-техник базасини мустаҳкамлаш, қатор тиббиёт муассасаларини модернизация қилиш ҳамда Ўзбекистонда анъанавий Хитой табобатини ривожлантиришга қаратилган грант лойиҳаларини амалга ошириш истиқболлари ҳам муҳокама қилинди.
Учрашув давомида Хитойнинг грант маблағлари ҳисобидан амалга ошириладиган лойиҳаларни жадаллаштиришга келишиб олинди.
