АҚШнинг Иммиграция ва божхона назорати ходими 7 январь куни Миннеаполис шаҳрида 37 ёшли аёлни отиб ўлдирди. Расмийлар воқеани ўзини ҳимоя қилиш ҳаракати деб баҳолаган бўлса-да, шаҳар мэри буни “эҳтиётсизлик” деб атади. Бу ҳақда BBC хабар берди.
АҚШ Ички хавфсизлик вазирлиги ҳалок бўлган аёл Рени Никол Гуд эканини, у иммиграция ходимларини “машинаси билан босиб кетишга урингани”ни даъво қилди. Бироқ Миннеаполис мэри Жейкоб Фрей бунга қарши чиқди. У буни “хизмат ваколатидан эҳтиётсиз фойдаланиш” эканини айтиб, оқибатда бир инсон ҳалок бўлганини таъкидлади. Мэр ҳақоратли сўзлар билан иммиграция ходимларини шаҳарни тарк этишга чақирди.
Оқ уйнинг ноқонуний мигрантларга қарши мамлакат бўйлаб олиб бораётган рейдлари доирасида юзлаб иммиграция ходимлари Миннеаполисга жойлаштирилган. Гувоҳлар томонидан ижтимоий тармоқларга жойланган видеоларда маҳаллий вақт билан соат 10:25 атрофида содир бўлган отишма лаҳзаси акс этган.
Турли ракурслардан олинган кадрларда тўқ қизил рангдаги автомобиль Миннеаполисдаги турар жой кўчасини тўсиб тургани кўринади. Яқин атрофда ҳуқуқ-тартибот идоралари машиналари ҳам бўлган. Иммиграция ходимлари йўлда тўхтаб турган автомобилга яқинлашиб, рулда ўтирган аёлдан машинадан тушишни талаб қилган. Агентлардан бири ҳайдовчи томонидаги эшик тутқичини тортган. Яна бир ходим эса автомобилнинг олд қисмида турган.
Видеода ходим автомобилга қанчалик яқин тургани ёки машина уни уриб юборган-йўқлиги аниқ кўринмайди. Агент автомобиль ҳаракатлана бошлаганида ўқ узади. Видеода уч марта ўқ овози эшитилади, автомобиль эса бошқарувни йўқотиб, кўча бўйида турган машинага бориб урилади.
Трамп Truth Social ижтимоий тармоғидаги постида иммиграция ходими “шафқатсизларча” босиб кетилганини ёзди.
“Унинг тирик эканига ишониш қийин, аммо ҳозир шифохонада даволанмоқда”, деб ёзди у.
Миннеаполис полицияси бошлиғи Брайан O’Харанинг айтишича, ҳайдовчи Портленд авенюсида йўлни тўсиб турган. Иммиграция ходими унга яқинлашганидан сўнг аёл автомобилни ҳайдаб кетишга уринган.
АҚШ ички хавфсизлик вазири Кристи Ноэмга кўра, аёл кун давомида иммиграция ходимларини “таъқиб қилган ва уларга тўсқинлик қилган”. Бундан ташқари, у офицерни босиб кетиш учун “ўз машинасини қурол сифатида ишлатишга” уринган. Ноэм федерал ходим ўзини ҳимоя қилиш мақсадида “ҳимоя ўқлари”ни қўллагани ва ўзи ҳам жароҳат олгани, ҳозирда даволаниб, касалхонадан чиқарилганини айтди.
“Худди шу агент июнь ойида хизмат вазифасини бажараётганда машина томонидан уриб кетилган”, деди у.
Вазир шаҳарда иммиграция хизмати операциялари давом этишини ва Федерал қидирув бюроси содир бўлган воқеани текширишини билдирди. Аёлнинг отиб ўлдирилиши ортидан маҳаллий аҳоли воқеа юз берган жойда норозилик намойишини ўтказди.
