АҚШ президенти Дональд Трамп Судан урушини тўхтатиш учун Саудия Арабистони, Бирлашган Араб Амирликлари (БАА), Миср ва Яқин Шарқдаги бошқа иттифоқчи давлатлар билан ҳамкорлик қилишини маълум қилди. Бу ҳақда унинг Truth Social’даги баёнотига таяниб, Anadolu хабар берди.
Трамп Оқ уйда қабул қилган Саудия Арабистони валиаҳд шаҳзодаси Муҳаммад бин Салмоннинг илтимосига кўра, Судан масаласига алоҳида эътибор қаратишини таъкидлаган.
“Суданда даҳшатли ваҳшийликлар содир бўлмоқда. У Ер сайёрасидаги энг зўравон жойга ва шу билан бирга энг йирик гуманитар инқирозга юз тутган ҳудудга айланган. Озиқ-овқат, шифокорлар ва бошқа ҳамма нарсага кескин эҳтиёж бор”, деб ёзган АҚШ президенти.
Унинг сўзларига кўра, мамлакатда ҳатто асосий гуманитар эҳтиёжлар ҳам қондирилмаяпти.
“Бутун дунёдаги араб етакчилари, жумладан, Қўшма Штатларни эндигина тарк этган, ҳурматга сазовор Саудия Арабистони валиаҳд шаҳзодаси ҳам Суданда содир бўлаётган воқеаларни зудлик билан тўхтатиш учун президентлик ваколатим ва таъсиримдан фойдаланишни сўради. Биз ушбу ваҳшийликларга чек қўйиш ва айни пайтда Судандаги вазиятни барқарорлаштириш учун Саудия Арабистони, Бирлашган Араб Амирликлари, Миср ва Яқин Шарқдаги бошқа ҳамкорлар билан ишлаймиз”, дея ваъда берган Трамп.
Судандаги вазият
Суданда 2023 йил апрель ойидан бери армия билан Тезкор ёрдам кучлари (Rapid Support Forces) жангарилари ўртасида фуқаролар уруши давом этмоқда. Жангларда шу кунгача 150 мингдан ортиқ киши ҳалок бўлиб, 14 миллиондан зиёд аҳоли ўз уйларини тарк этишга мажбур бўлган. Мамлакатнинг ғарбий қисмидаги Дарфур минтақасининг энг йирик шаҳри — Ал-Фашр кучли жанглардан кейин асосан RSF назоратига ўтган.
