АҚШ ва Хитойнинг юқори даражадаги савдо музокарачилари бир қатор баҳсли масалалар бўйича келишувга эришганини маълум қилди. Бу икки мамлакат раҳбарлари – Дональд Трамп ва Си Цзиньпин орасидаги янги савдо битимини имзолаш учун йўл очмоқда.
«Бу борадаги музокаралар Малайзия пойтахти Куала-Лумпурда икки кун давом этди», деб хабар берди Bloomberg агентлиги.
Ҳозирда икки томон музокара натижаларини ўз раҳбарларига тақдим этишга тайёрланмоқда. Трамп ва Си Цзиньпин 30 октябрь куни бўлиб ўтадиган саммитда расмий равишда битимни тасдиқлаши кутиляпти.
АҚШ молия вазири Скотт Бессентнинг маълум қилишича, Трампнинг Хитой товарларига 100 фоизлик бож жорий этиш ҳақидаги таҳдиди «амалда кун тартибидан чиқарилган». Унинг сўзларига кўра, Хитой яқин вақтда АҚШдан катта ҳажмда соя донлари харид қилади ҳамда камёб металллар экспорти бўйича қатъий чекловларни кечиктиради. Шу билан бирга, Вашингтон Хитойга нисбатан экспорт назорати сиёсатига ўзгартиш киритмаслигини маълум қилди.
Янги битим доирасида бир қатор муҳим йўналишлар қамраб олинган, жумладан:
– тарифлар бўйича тинчлик даврини узайтириш;
– TikTok атрофидаги низоларни ҳал этиш;
– юқори технологияли ишлаб чиқариш учун зарур бўлган камёб магнит материаллар етказиб беришни кафолатлаш.
Трамп ва Си Цзиньпин, шунингдек, глобал тинчлик ташаббусини муҳокама қилишни режалаштирмоқда. Трампнинг айтишича, у Си Цзиньпин билан биргаликда Россия ва Украина ўртасидаги можарога дипломатик ечим топишни хоҳлайди.
АҚШ савдо вакили Джеймисон Грирнинг таъкидлашича, Хитойдан камёб металллар етказиб бериш бўйича чекловларни бекор қилиш «музокаралардаги энг асосий мақсадлардан бири» бўлиб, бу йўналишда «сезиларли илгарилаш»га эришилган.
Ўз навбатида, Дональд Трамп Куала-Лумпурдаги АСЕАН саммити доирасида журналистлар билан суҳбатда «Хитой билан фойдали келишув» кутаётганини билдирди.
«Улар битим тузишни хоҳлашяпти ва биз ҳам буни хоҳлаймиз», – деди АҚШ президенти.
Хитойнинг савдо вакили Ли Чэнган музокараларни «жиддий, лекин самарали» деб баҳолади. Унинг айтишича, томонлар фентанил моддаси билан боғлиқ муаммолар бўйича ҳам келишувга яқинлашган. Бу АҚШнинг Хитойга нисбатан айрим 20 фоизлик божларини бекор қилиш ёки камайтириш имконини бериши мумкин.
Шунингдек, икки давлат администрациялари денгиз орқали юк ташиш учун жорий этилган порт йиғимлари масаласини ҳам муҳокама қилмоқда. Хитой бу чораларга жавоб тариқасида АҚШ билан боғлиқ кемаларга нисбатан ўз йиғимларини жорий этган эди.
«Биз бугунги беқарорлик даврини орқада қолдирмоқчимиз. Барқарор савдо ва иқтисодий алоқалар фақат Хитой ва АҚШ учун эмас, балки бутун жаҳон иқтисодиёти учун фойдали бўлади», – дейди Ли Чэнган музокаралар якунида.
30 октябрь куни Трамп ва Си Цзиньпиннинг учрашуви – Трамп Қўшма Штатлар президентлигига қайтганидан бери икки давлат раҳбарларининг илк шахсий мулоқоти бўлади. Музокаралар доирасида тарифлар, экспорт чекловлари, қишлоқ хўжалиги маҳсулотлари савдоси, фентанил айланмаси ва геосиёсий масалалар муҳокама қилиниши кутилмоқда.
