Аҳоли уйларига энергия самарадор қурилма ва ускуналар ўрнатиш учун субсидия ажратиш тўғрисидаги низом тасдиқланди. Бу ҳақда Адлия вазирлиги хабар қилди.
Низом аҳоли уй-жойларини энергия аудитидан ўтказиш харажатларини қоплаш, қуёш панеллари, гелиоколлекторлар, иссиқлик насослари ҳамда бошқа маиший иситиш қозонлари, қурилма ва ускуналарни харид қилиш, уларни ўрнатиш учун сарфланган пулларнинг бир қисмини қоплаш учун субсидия ажратиш тартибини белгилайди.
Маблағ талабгорга уйга энергия самарадор қурилма тегишли аудитор хулосаси асосида ўрнатилганда берилади ва ускуналарни харид қилиш учун тўловлар субсидия ажратиладиган қисм чегириб ташланган ҳолда амалга оширилади. Пуллар Энергия самарадорлиги миллий агентлиги томонидан етказиб берувчига тўлаб берилади.
Субсидия қуйидаги миқдорларда ажратилади:
- аҳоли уй-жойларини энергия аудитидан ўтказиш харажатларининг 100 фоизи миқдорида;
- қуёш панеллари, гелиоколлекторлар ҳамда бошқа маиший иситиш қозонлари, қурилма ва ускуналарни харид қилиш ҳамда ўрнатиш харажатларининг 20 фоизи миқдорида;
- иссиқлик насосларини харид қилиш ва ўрнатиш харажатларининг 40 фоизи миқдорида, бунда ушбу йўналишда ажратиладиган субсидия миқдори базавий ҳисоблаш миқдорининг 50 бараваридан ошмаслиги лозим.
Агар талабгор тижорат банкларидан “яшил” кредит олиш мақсадида уй-жойни энергия аудитидан ўтказиш тўғрисида сўров юбориб, шартнома расмийлаштирса, шартнома суммаси 100 фоиз миқдорда олдиндан ўтказилади ҳамда платформада вақтинча банд қилинади.
