Қирғизистон президенти Садир Жапаров 16 ноябрь куни Марказий Осиё давлатлари раҳбарларининг еттинчи Маслаҳат учрашувида нутқ сўзлади. Сиёсатчи Ўзбекистонда “Марказий Осиё бирдамлигининг ҳақиқий руҳини ҳис қилиш мумкин”лигини айтди.
“Биз доимо ўзгача ҳис-туйғу билан қардош Ўзбекистонга ташриф буюрамиз, бу ерда Марказий Осиё бирдамлигининг ҳақиқий руҳини ҳис қилиш мумкин. Ўзбекистонлик биродарларимизни Самарқандда ЮНЕСКО Бош Ассамблеясининг 43-сессияси муваффақиятли ўтказилгани билан табриклайман.
Сессия 41 йил ичида биринчи марта Париждан ташқарида бўлиб ўтди, бу Марказий Осиёнинг халқаро гуманитар жараёнлардаги роли ортиб бораётганини тасдиқловчи тарихий воқеадир. Ўзбекистоннинг раислиги бутун минтақа учун самарадорлик, ташаббускорлик ва амалий натижаларга интилиш намунаси бўлди”, деди Садир Жапаров.
Интеграцияни янада чуқурлаштириш учун Қирғизистон президенти учта асосий қадамга эътибор қаратишни таклиф қилди:
- Биринчиси: ўзаро савдодаги тўсиқларни фаол бартараф этиш, стандартлар ва техник регламентларни уйғунлаштириш.
- Иккинчиси: хом ашё моделидан воз кечиб, аниқ қўшма ишлаб чиқариш занжирларини ривожлантириш, қайта ишлаш саноатини ва янги саноат кластерларини шакллантириш.
- Учинчиси: рақамлаштиришдан ўсиш катализатори сифатида фойдаланиш: электрон тижоратдан тортиб, ахборот алмашиш ва киберҳавфсизликни мустаҳкамлаш учун трансчегаравий платформалар яратишгача.
Транспорт инфратузилмасини ривожлантириш масалаларига тўхталар экан, Садир Жапаров минтақада янги транспорт артерияси яратилаётганини таъкидлади.
Хитой—Қирғизистон—Ўзбекистон стратегик аҳамиятга эга темир йўлининг қурилиши нафақат мамлакатларни боғлайди, балки логистикани қайта шакллантиради, давлатларимизга Осиё ва Европанинг энг йирик бозорларига энг қисқа йўлни очиб беради.
Шу нуқтаи назардан, Зангезур йўлаги қурилиши лойиҳаси Хитой—Қирғизистон—Ўзбекистон темир йўлининг мантиқий ва стратегик давоми сифатида баҳоланмоқда. Транспорт соҳасидаги ҳамкорлик самарадорлигини ошириш мақсадида божхона маълумотларини алмашиш ва ҳужжатларни “ягона дарча” тамойили асосида расмийлаштириш учун “Рақамли транзит йўлаги” ягона электрон платформасини ишлаб чиқиш ва ишга туширишни таклиф этаман, деди у.
Якунида президент Садир Жапаров Ўзбекистоннинг самарали раислигини қайд этиб, Туркманистонга муваффақиятлар тилади ҳамда Қирғизистон эришилган барча келишувларни фаол қўллаб-қувватлаш ва илгари суришга тайёр эканини таъкидлади.
