Transfermarkt нашри энг қиммат таркибга эга клублар рўйхатини эълон қилди. Маълумотларга кўра, энг қиммат таркиб “Реал Мадрид” жамоасига тегишли бўлиб, “Қироллик клуби” асосий жамоаси футболчиларининг умумий қиймати 1,38 миллиард еврони ташкил этади. Кейинги ўринларда жорий мавсум АПЛ етакчиси “Арсенал” (1,29 млрд евро), шунингдек “Манчестер Сити” ва “ПСЖ” (1,19 млрд евро) қайд этилган.
Энг қиммат таркибга эга футбол клублари:
- “Реал Мадрид” — 1,38 млрд евро
- “Арсенал” — 1,29 млрд евро
- “Манчестер Сити” — 1,19 млрд евро
- “ПСЖ” — 1,19 млрд евро
- “Челси” — 1,18 млрд евро
- “Барселона” — 1,12 млрд евро
- “Ливерпуль” — 1,04 млрд евро
- “Бавария” — 980 млн евро
- “Тоттенҳэм” — 878,5 млн евро
- “Манчестер Юнайтед” — 719,5 млн евро
Ўзбекистоннинг энг қиммат таркибга эга клуби “Пахтакор” бўлиб, жамоа футболчиларининг умумий қиймати 12,38 миллион еврони ташкил этади. “Насаф” клубида эса бу кўрсаткич 9,93 миллион еврога тенг.
Аввалроқ, Transfermarkt дунёнинг энг қиммат футболчилари рейтингини ҳам эълон қилган эди. Унга кўра, бир йўла уч нафар футболчи — Килиан Мбаппе (“Реал Мадрид”), Ламин Ямал (“Барселона”) ва Эрлинг Ҳоланд (“Манчестер Сити”) 180 миллион евро трансфер қиймати билан биринчи ўринни эгаллаган.
Шунингдек, Ўзбекистон Суперлигаси ва Пролигаси футболчиларининг трансфер қийматлари янгиланди. Суперлигада энг катта ўсишга “Пахтакор” ҳимоячиси Ҳожиакбар Алижонов эришди. У жорий мавсумда 26 та учрашувда майдонга тушиб, 2 та гол ва 12 та голли узатма муаллифи бўлди. Унинг трансфер қиймати 400 минг еврога ошиб, 1,2 миллион еврога етди.
Бундан ташқари, “Насаф”нинг истеъдодли футболчиси, мавсум кашфиёти сифатида эътироф этилаётган Сардорбек Баҳромов ҳам сезиларли ўсишга эришди. Унинг трансфер қиймати 350 минг еврога ошиб, ҳозирда 400 минг еврони ташкил қилмоқда.
Абдувоҳид Неъматов (1,5 млн евро), Ҳожимат Эркинов (1,3 млн евро), Шерзод Насруллаев (1,2 млн евро), Ҳожиакбар Алижонов (1,2 млн евро), Люпчо Дориев (1,2 млн евро), Игор Сергеев (1,2 млн евро), Хуршид Ғиёсов (1 млн евро) ва Жамшид Искандеров (1 млн евро) Суперлиганинг энг қиммат футболчилари сифатида қайд этилган.
