Centrum Air сайти орқали Истанбул–Наманган йўналишида билет сотиб олган фуқаролар самолётга сиғмай қолди. Бу ҳақда Рақобат қўмитаси хабар қилди.
Қайд этилишича, фуқаро 2025 йил 26 сентябрь куни ўзи ва турмуш ўртоғи учун сайт орқали 2 та билет сотиб олган, бироқ авиакомпания томонидан ортиқча чипта сотилгани сабаб уларга самолётда жой етмай қолиб, Истанбул аэропортида қолиб кетишган.
Бир суткадан сўнг фуқароларга Истанбул–Тошкент рейсида парвоз қилиш таклиф қилинган ва улар шу рейсда қайтиб келишган. Чипта харид қилган шахс ҳолатдан норози бўлиб, истеъмолчилик ҳуқуқлари тикланиши юзасидан ҳудудий бошқармага мурожаат қилган.
Ўрганишлар давомида Centrum Air авиакомпанияси ўз хатоси сабаб юзага келган ноқулайлик учун фуқаро билан келишилган ҳолда айрим компенсация ва имтиёзларни тақдим этгани маълум бўлди.
Бунда 500 евро миқдорда компенсация, қўшимча 865 200 сўмлик товон, авиакомпаниянинг исталган йўналишларига кейинги сафарга 20 фоиз чегирма берувчи промокод, 23 кило қўшимча бепул багаж ҳамда парвоз давомида самолётнинг биринчи қаторидаги жойлардан бепул фойдаланиш имконияти берилган.
“Қўмита томонидан амалга оширилган ишлар натижасида фуқаронинг истеъмолчи сифатидаги ҳуқуқлари тўлиқ тикланиши таъминланди”, дейилади хабарда.
