Бугун, 21 апрель куни Япониянинг жануби-ғарбидаги мудофаа кучлари полигонида танк снарядининг портлаши оқибатида 3 нафар ҳарбий ҳалок бўлди, яна бири жароҳатланди. Бу ҳақда “Kyodo news” xабар қилди.
Қайд этилишича, ҳодиса Оита префектурасидаги Хижудай полигонида танк машғулотлари вақтида юз берган. Маълумотларга кўра, танк снаряд отилишидан олдин портлаб кетган. Ҳалок бўлганларнинг иккиси 30 ёш атрофида, яна бири эса 40 ёш атрофида бўлган. Улар ҳарбий танк командири, тўпчи, хавфсизлик бўйича масъул ва ҳайдовчи вазифаларини бажарган.
Япония Мудофаа вазири Синдзиро Коидзуми Токиодаги парламент биносида журналистларга берган баёнотида ҳодисанинг тафсилотлари ва сабабини аниқлашга ҳаракат қилинаётганини билдирган.
“Бу жуда ачинарли ҳолат. Биз хавфсизлик чораларини янада кучайтирамиз”, дейди Коидзуми.
Маҳаллий ёнғин хавфсизлиги хизмати маълумотига кўра, жароҳатланган ҳарбий ҳушини йўқотмаган, бироқ юз қисмида куйиш жароҳатлари бор.
