Кеча, 18 декабрь куни сенаторлар 2026 йил учун Ўзбекистон давлат бюджети тўғрисидаги қонунни маъқуллади. Қонун муҳокамаси чоғида бюджет прогнозларида олтин нархи ўсиши инобатга олинганми, деган савол янгради.
Иқтисодиёт ва молия вазири ўринбосари Аҳадбек Ҳайдаровнинг айтишича, олтин нархи ўзгариши узоқ муддатли тенденциялардан келиб чиқиб прогноз қилинади.
“Олтин нархи охирги икки йилда жаҳон иқтисодиётидаги ноаниқлик ва мураккабликлар сабаб ортиб боряпти. Давлат бюджети лойиҳасини тайёрлаганда ҳар доим олтин нархи консерватив тарзда инобатга олинади. Яъни қисқа муддатли нарх тебранишлари эмас, балки узоқ муддатли тенденциялар, яъни унга таъсир қилувчи фундаментал факторлардан келиб чиқиб белгилаганмиз. Агар олтин нархи қисқа муддатли нархлар ошиши ҳисобига қўшимча даромадлар келтирса, бу бўйича ахборот берилади. Олтиндан қўшимча даромадларнинг бир қисми йил давомида қабул қилинадиган қарор ва фармонлар асосидаги мақсадларга ёки бюджет тақчиллигини қисқартиришга хизмат қилади”, деди вазир ўринбосари.
Ўзбекистон йиллик экспорти тушумларининг қарийб учдан бир қисми олтин сотувидан келади. 2025-йилда қимматбаҳо металл нархи рекорд даражада ошди. 2026—2028-йилларга мўлжалланган бюджетномада мазкур тенденция мамлакат умумий экспорт ҳажмига ижобий таъсир кўрсатгани ва ташқи савдо балансидаги тақчиллик яхшиланишида катта рол ўйнагани қайд этилган.
Мамлакатда 2025-йилда ер қаъридан фойдаланганлик учун солиқ тушумлари 26 фоизга кўпайди. Бу тоғ-кон саноати корхоналарининг асосий ишлаб чиқариш товари ҳисобланган олтиннинг жаҳон бозоридаги нархи кескин ошгани билан боғлиқ. Ўз навбатида, қимматбаҳо металл қиймати юқорилиги таъсирида фойда солиғи тушумлари 30 фоизга ортган, дивиденд тўловлари ҳам сезиларли ўсган. Маълумот учун, 2025-йилда мамлакатда 118 тонна олтин қазиб олиниши кутилаётгани билдирилган.
