АҚШ президенти Дональд Трамп мамлакатнинг 2026-молия йилига мўлжалланган мудофаа бюджетини имзолади. Ҳужжатга кўра, ҳарбий харажатлар учун рекорд даражадаги 901 миллиард доллар ажратилади. Бу ҳақда Оқ уй маълум қилди.
Миллий мудофаа тўғрисидаги қонун Уруш вазирлигига менинг “куч орқали тинчлик” сиёсатимни амалга ошириш, ватанни ички ва ташқи таҳдидлардан ҳимоя қилиш ҳамда мудофаа-саноат базасини мустаҳкамлаш имконини беради. Шу билан бирга, мамлакатимиз ҳарбийларининг жанговар руҳиятига путур етказадиган исрофгарчилик ва радикал дастурларни молиялаштиришни тўхтатади, дейилади Трампнинг Оқ уй сайтида эълон қилинган баёнотида.
АҚШ Конгрессининг Вакиллар палатаси қонунни 11 декабрь куни маъқуллаган, 17 декабрда эса ҳужжат Сенат томонидан қабул қилинган. Қонун ҳарбий хизматчилар иш ҳақини 3,8 фоизга ошириш, ҳарбий техника хариди ҳамда АҚШнинг асосий рақиблари — Хитой ва Россияга нисбатан рақобатбардошлигини кучайтиришга қаратилган чораларни назарда тутади.
- Трамп сўраганидан кўпроқ маблағ ажратилди
2026-йилги мудофаа бюджети, шунингдек, Европадаги хавфсизликни мустаҳкамлашга қаратилган бир қатор бандларни ҳам ўз ичига олади. Бу эса Трамп ой бошида тақдим этган АҚШ миллий хавфсизлик стратегиясига қисман зид келади. Умуман олганда, 901 миллиард долларлик мудофаа бюджети президент сўраган суммадан 8 миллиард долларга кўп.
Трамп Конгрессдан 2026 йил учун ҳарбий харажатларга 892,6 миллиард доллар ажратишни сўраган эди. Сенат дастлаб ушбу маблағни 925 миллиард долларгача оширишни таклиф қилган, Вакиллар палатаси эса Трамп сўраган миқдорни қўллаб-қувватлаган. 30 сентябрда якунланган 2025-молия йилида АҚШнинг мудофаа бюджети 884 миллиард долларни ташкил этган.
- Украинага ҳарбий ёрдам ва Болтиқбўйи давлатлари мудофааси
Ҳужжатда Украинани қўллаб-қувватлашга алоҳида эътибор қаратилган. Қонунга кўра, Украина хавфсизлигини қўллаб-қувватлаш ташаббуси доирасида 800 миллион доллар ажратилади. Ушбу маблағ кейинги икки йил давомида ҳар йили 400 миллион доллардан тақсимланади. Ажратилган маблағлар Америка компаниялари орқали Украина Қуролли кучлари учун қурол-яроғ харид қилишга йўналтирилади.
Бундан ташқари, Эстония, Латвия ва Литва — Болтиқбўйи давлатлари мудофааси учун яна 175 миллион доллар ажратилиши кўзда тутилган. Шунингдек, қонун АҚШ Мудофаа вазирлигининг Европадаги америкалик ҳарбийлар сонини 76 минг нафардан пастга тушириш имкониятини чеклайди.
