Президент Шавкат Мирзиёев ЮНЕСКО Бош директори Одри Азуле хонимни Ўзбекистон Республикасининг «Дўстлик» ордени билан мукофотлаш тўғрисидаги фармонни имзолади.
Одри Азуле хоним Ўзбекистон Республикаси ва ЮНЕСКО ўртасида ўзаро ҳамкорликни мустаҳкамлаш ва янги босқичга олиб чиқиш, хусусан, фан, таълим ва маданият соҳаларида алоқаларни ривожлантиришдаги катта хизматлари, халқимизнинг қадимий тарихи, бой маданий меросини, миллий қадрият, урф-одат ва анъаналарини жаҳон миқёсида тарғиб этиш, мамлакатимиз томонидан илгари сурилган ташаббусларни ҳар томонлама қўллаб-қувватлашга қўшган муносиб ҳиссаси, шунингдек, дунё халқлари орасида маданиятлараро мулоқотни чуқурлаштириш, дўстлик ва ҳамжиҳатликни мустаҳкамлаш йўлидаги самарали фаолияти учун мазкур мукофотга лойиқ кўрилган.
