Куала-Лумпурда Ўзбекистон фуқаролари учун визасиз тартибни янада соддалаштириш масаласи муҳокама қилинди, деб хабар берди Дунё” ахборот агентлиги.
Маълум қилинишича, Ўзбекистоннинг Малайзиядаги элчихонаси вакиллари ушбу давлат Миграция департаменти бош директори ўринбосари Аминудин бин Яҳая билан учрашди. Мулоқотда Ўзбекистон фуқаролари учун 30 кунгача визасиз тартибни янада соддалаштириш ва узоқ муддатли виза олиш жараёнларини енгиллаштириш масалалари муҳокама қилинди.
Ўзбекистон ва Малайзия давлат раҳбарларининг ўзаро расмий ташрифлари давомида эришилган келишувлар натижасида савдо-иқтисодий, туризм, таълим, маданий-гуманитар йўналишларда халқлар ўртасидаги мулоқот ва ҳамкорлик изчил ривожланиб бораётганига эътибор қаратилди. Аминудин бин Яҳая Ўзбекистонда амалга оширилаётган ислоҳотларни юқори баҳолаб, сўнгги йилларда Ўзбекистон ва Малайзия ўртасидаги сайёҳлар сони ошиб бораётганини эътироф этди.
Миграция департаменти вакиллари Малайзияда қонуний бўлиб туриш учун рухсатномалар олган Ўзбекистон фуқаролари сони тобора кўпаётганини билдирди. Ўзбекистонликлар Малайзияга асосан таълим олиш ва малакали мутахассис сифатида меҳнат фаолияти олиб бориш учун келаётгани қайд этилди.
