Тошкент шаҳрининг Чилонзор туманида умумий нархи 1 млрд бўлган кучли таъсир қилувчи моддалар аниқланди. Бу ҳақда Ички ишлар вазирлиги хабар берди.
Маълум бўлишича, Д. исмли шахс бошқарувидаги Damas русумли автомашина тўхтатилиб, холислар иштирокида кўздан кечирилганда автомобилнинг салон қисмидан жами 368 дона оқ рангли, кучли таъсир қилувчи дори воситалари аниқланиб, икки нафар холислар иштирокида ҳужжатлар расмийлаштирилган ва дастлабки суриштирув ишлари олиб борилиш учун туман Ички ишлар бўлимига олиб келинган.
Ҳудуддаги кузатув камералари ўрганилиб, ушбу кучли таъсир қилувчи дори воситаларини “закладка” усули билан турли манзилларга яшириб чиққан шахс аниқланган. Фуқаронинг шахсига аниқлик киритилиб, яшаш хонадони холислар иштирокида кўздан кечирилган.
Аниқланишича, унинг ётоқхонасидаги диван ёнидан қора полиэтилен пакетда елим идишда оқ рангли кукунсимон моддалар, зиппакетлар, турли хил рангдаги изоленталар, бир дона электрон тарози ҳамда сарғиш рангли тошсимон модда борлиги аниқланиб, холис иштирокида олиниб баённома расмийлаштирилган.
Тезкор тадбир давом эттирлиб, Газел русумли автомашинада бўлган шубҳали икки нафар шахс холислар иштирокида кўздан кечирилган. Натижада ўриндиқнинг тагидан жами 391 дона кучли таъсир қилувчи капсулалар борлиги аниқланган. Ҳамда ушбу автотранспорт воситасининг орқа томонидаги кичик юк хонасидан 59 дона елим идишга солинган номаълум суюқлик борлиги аниқланган.
Транспорт воситасидан аниқланган барча ашёвий далиллар холислар иштирокида расмийлаштирилиб, эксперт криминалистик марказига топширилган.
Ўтказилган тадбирлар натижасида умумий нархи 1 млрд 28 млн 500 минг сўмга тенг бўлган кучли таъсир қилувчи дори воситалари расмийлаштириб олинган.
