Самарқанд вилоятининг Жомбой туманида Йўл ҳаракати хавфсизлиги ходимлари томонидан Damas салонига 24 ва 28 нафар болани миндириб ҳаракатланётган икки ҳайдовчи аниқланди. Бу ҳақда вилоятнинг Йўл ҳаракати хавфсизлиги бошқармаси хабар қилди.
Манбада айтилишича, Жомбой туманида ҳайдовчи 24 нафар болани ҳар куни ўзининг Damas автомашинасида мактабгача таълим муассасасига ташиш билан шуғулланган. Автоуловдаги болалар ҳам буни тасдиқлаган.
Худди шунга ўхшаш ҳолат яна бошқа ҳайдовчи билан ҳам содир бўлган. Буниси эса 28 нафар болани автомобилига миндириб кетётганда ходимлар томонидан тўхтатилган.
Ҳолат юзасидан ҳайдовчиларга тегишли маъмурий баённома тузилиб, автомобиллари жарима майдончасига олиб борилган.
