Малайзиянинг собиқ бош вазир Нажиб Разак мансабни суиистеъмол қилиш ва молиявий жиноятлар бўйича айбдор деб топилди. Бу ҳақда “The Star” хабар берди.
Кеча, 26 декабрь куни Куала-Лумпур Олий суди кўп йиллик суд жараёнлари якунида собиқ бош вазирни мансабни суиистеъмол қилиш бўйича тўрт эпизод ва пул ювиш бўйича 21 эпизодда “шубҳасиз” айбдор деб топган. Маҳаллий ОАВ хабарига кўра, суд Нажиб Разакка 15 йил озодликдан маҳрум қилиш жазоси тайинлаган.
Суд ҳукмининг асословчи қисмида айтилишича, айбланувчининг бу ишлар “сиёсий сабаблар билан уюштирилган таъқиб” деган даъволари совуқ, қатъий ва инкор этиб бўлмайдиган далиллар билан рад этилган. Ушбу далиллар Нажиб Разак давлатнинг 1MDB инвестиция жамғармасидаги қудратли мавқеи ва кенг ваколатларини суиистеъмол қилганини кўрсатади. Шунингдек, у юзлаб миллион АҚШ доллари нега унинг шахсий банк ҳисобига келиб тушганини ҳам изоҳлаб бера олмаган.
Уч йил давом этган 302 та суд мажлисидаги суд маълумотларига кўра, давлат инвестиция жамғармасидан ўзлаштирилган 462 миллион еврога тенг маблағ билан боғлиқ иш кўриб чиқилган. Нажиб Разак 2009–2018 йилларда Малайзия бош вазири лавозимида ишлаган ва айни пайтда мамлакат молия вазири ҳам бўлган.
72 ёшли Нажиб ҳозирда давлат жамғармаси билан боғлиқ аввалги иш бўйича чиқарилган ҳукм асосида олти йиллик қамоқ жазосини ўтамоқда. Тўрт кун аввал суд унинг қолган муддатини уй қамоғига алмаштириш ҳақидаги илтимосини рад этган.
Нажиб давридаги коррупция ва қариндош-уруғчилик сабабли унинг нуфузли UMNO партияси (Бирлашган Малай миллий ташкилоти) сўнгги икки сайловда мағлубиятга учраган. Этник жиҳатдан мусулмонлар кўпчилигини ташкил этган бу партия 1957 йилда мустақилликка эришилганидан буён Малайзияда ҳукмронлик қилиб келган эди.
