АҚШнинг Жоржия штатида вояга етмаганларни жинсий эксплуатация қилишда айбланган америкалик марҳум молиячи Жеффри Эпштейннинг 10 йилдан буён ташландиқ ҳолда турган хусусий самолёти топилди. Бу ҳақда “New York Post” нашри хабар берди.
Нашрнинг ёзишича, Эпштейннинг 133 фут (40,5 метр) узунликдаги машҳур Boeing 727 “Lolita Express” самолётида содир этилган жиноятларига оид излар ҳали ҳам сақланиб қолган. Бу самолётни Эпштейн ўзининг ёш қурбонларини жинсий қуллик учун дунё бўйлаб ташиш мақсадида ишлатган.
Фотосуратларда самолётнинг ташқи қисми чириётгани, бўлакларга ажралгани, ички қисмида эса ҳашаротлар ва моғор босгани акс этган. Ушбу ҳашаматли самолётда ётоқхоналар, учта алоҳида дам олиш ҳудуди, ошхона ва иккита ҳожатхона ҳали ҳам мавжуд.
Шунингдек, самолёт ичида сунъий йўлдош телефони, ётоқ, болалар учун лосён ва кукун, кир сочиқлар, Эпштейннинг самолёти рақами билан монограмма туширилган салфеткалар топилган.
Самолётнинг ётоқхонаси Эпштейн ва унинг жиноий шерикларига учиш вақтида жинсий ҳаракатлар учун мосланган. Самолёт яна бошқа ётоқхоналар, дам олиш хоналари, қизил матолар билан қопланган диван ва креслолар билан жиҳозланган. Ошхона ва бошқа хоналар эса ҳашаматли, аммо қоронғу ва ташландиқ ҳолатда топилган.
Самолётнинг учта двигатели 2016 йилда олиб ташлангани оқибатида у энди уча олмайди. Самолёт ҳужжатларда Эпштейн ва унинг шериги Гислейн Максвелл билан боғлиқ JEGE Inc. компанияси томонидан 2001 йилда сотиб олингани кўрсатилган. Эпштейн уни 2018 йил охирида Флорида штатидаги World Aviation Services LLC компаниясига сотган, 2024 йилда эса Jet Assets Incorporated компанияси томонидан харид қилинган.
Дастлаб самолётни парчалаб, ташлаб юбориш режалаштирилган бўлса-да, у 2016 йилдан буён сақланиб келмоқда ва сақлаш учун катта харажатлар сарфланмоқда.
