Андижонда давлат захирасидаги 24 сотих ер майдонини ноқонуний равишда сотишга уринган шахс қўлга олинди. У харидордан 39 минг доллар талаб қилган ва 25 минг долларни олаётган вақтида ушланган. Бу ҳақда вилоят Ички ишлар бошқармаси хабар берди.
Аниқланишича, Марҳамат туманида яшовчи 1988 йилда туғилган шахс бошқа шахслар билан олдиндан тил бириктириб, давлат захирасидаги 24 сотих ер майдонини гўёки тураржой тоифасига ўтказиш ва харидор номига расмийлаштириб бериш мумкинлигини айтган.
У мазкур ернинг ҳар бир сотихини 1 700 АҚШ долларидан ҳисоблаб, жами 39 минг АҚШ долларига сотишга келишган. Тезкор тадбир давомида гумонланувчи келишилган маблағнинг 25 минг АҚШ долларини Марҳамат тумани ҳудудида олаётган вақтида ашёвий далиллар билан ушланди.
Билдирилишича, мазкур ҳолат юзасидан Ўзбекистон Республикаси Жиноят кодексининг 168-моддаси (фирибгарлик) 4-қисми “а” банди билан жиноят иши қўзғатилган. Ҳозирда тергов ҳаракатлари олиб борилмоқда.
