Андижон шаҳрида фуқароларга нисбатан зўравонлик қилиб, низоларни “кўча ечими” орқали ҳал қилиб келган жиноий гуруҳ фаолиятига чек қўйилди. Бу ҳақда вилоят ИИБ хабар берди.
Маълум қилинишича, 10 март куни вилоят Ички ишлар бошқармаси тезкор-қидирув хизмати ҳамда Давлат хавфсизлик хизмати вилоят бошқармаси ходимлари ҳамкорлигида ўтказилган тезкор тадбир давомида бир гуруҳ шахсларнинг ноқонуний фаолияти фош этилган.
Аниқланишича, жиноий гуруҳ етакчиси сифатида кўрсатилаётган, 1995 йилда Асака туманида туғилган Исмоилов Муҳаммадумар Бахтиёр ўғли (лақаби Умар) аввал Жиноят кодексининг 277, 110, 112 ва 137-моддалари билан судланган. Унинг шериги 1993 йилда Избоскан туманида туғилган Эргашев Элмурод Бегижон ўғли (лақаби Элмиш) ҳам ушланган, у муқаддам Жиноят кодексининг 104, 166, 168, 266 ва 277-моддалари билан судланган.
Терговга кўра, ушбу шахслар ўзларини қонундан устун қўйиб, жамиятда юриш-туриш қоидаларини қўпол равишда бузиб келган ҳамда фуқароларга руҳий ва жисмоний босим ўтказган. Улар кафеда моддий манфаат эвазига фуқаролар ўртасидаги мулкий низоларни “кўча ечими” усулида ҳал қилиб, безорилик ҳаракатларини содир этиб келган.
Хусусан, 23 февраль куни Исмоилов Муҳаммадумар ва унинг шериги Эргашев Элмурод мазкур кафега келиб, ходимларни ҳақорат қилган ҳамда 2007 йилда туғилган йигитни уриб, унга тан жароҳати етказган. Шундан сўнг улар жиноий ҳаракатларини давом эттириб, 1992 йилда Андижон шаҳрида туғилган эркакни ҳам кафега чақириб, у билан жанжал чиқарган.
Қайд этилишича, улар ушбу фуқарони кафе ичидаги хоналардан бирига олиб кириб, уни ҳам дўппослаб, тан жароҳати етказган. Мазкур ҳолат юзасидан Жиноят кодексининг 277-моддаси 3-қисми “а” банди (безорилик) билан жиноят иши қўзғатилиб, гумонланувчилар процессуал тартибда қамоққа олинган. Ҳозирда жиноят иши бўйича тергов ҳаракатлари олиб борилмоқда.
Ички ишлар органлари фуқаролардан ушбу жиноий гуруҳ фаолиятидан жабр кўрган ёки улар ҳақида қўшимча маълумотга эга бўлган шахсларни ишонч телефонлари орқали мурожаат қилишга чақирди. Мурожаат қилган фуқароларнинг шахси сир сақланиши кафолатланиши таъкидланди.
Ўзбекистоннинг турли ҳудудларида 2026 йил январь ойида ҳам кўча безорилиги, товламачилик, зўравонлик ва фуқароларга босим ўтказиш билан шуғулланган уюшган жиноий гуруҳларни аниқлаш ва қўлга олиш бўйича кетма-кет тезкор тадбирлар ўтказилган.
Ички ишлар вазирлиги Тезкор-қидирув департаментининг изоҳига кўра, мазкур тезкор тадбирлар криминоген вазиятни барқарорлаштириш, уюшган безорилик ва оғир жиноятларнинг олдини олишга қаратилган кучайтирилган чоралар доирасида амалга оширилмоқда.
Ушбу ишлар президентнинг 2025 йил 3 ноябрь кунги “Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича комплекс чора-тадбирлар тўғрисида”ги фармони ижросини таъминлаш мақсадида ИИВ ва ДХХ ҳамкорлигида олиб борилмоқда.
