АҚШнинг Калифорния штатида F-35B русумидаги бешинчи авлод қирувчи самолёти ҳалокатга учради. Самолёт учувчиси катапулта орқали қутулишга муваффақ бўлган ва унинг ҳаётига хавф йўқлиги маълум қилинди. Бу ҳақда Al-Jazeera ёзмоқда.
АҚШ Денгиз пиёдалари корпуси хабарига кўра, ҳодиса 1 август куни Сан-Диего шаҳри яқинидаги Мирамар ҳарбий авиабазаси яқинида содир бўлган.
“Учувчи катапулта орқали самолётни тарк этди. У тиббий кўрик ва ҳаёт учун хавф туғдирмайдиган жароҳатларни даволаш мақсадида шифохонага етказилди. Унинг аҳволи барқарор”, дейилади расмий баёнотда.
Воқеа жойидан олинган видеоларда очиқ майдонда қулаб тушган самолёт қолдиқларидан қуюқ қора тутун кўтарилаётгани кўринади. Ҳудудга ҳарбийлар ва ўт ўчирувчилар жалб қилинган. Ёнғинни ўчириш учун махсус кўпик ва сувдан фойдаланилган.
Сан-Диего ёнғин хавфсизлиги хизмати вакили Кендис Ҳедлининг маълум қилишича, самолёт қулаганидан сўнг яқин атрофдаги ўтлоқда ёнғин юзага келган ва ўт ўчирувчилар уни бартараф этишга киришган.
Мирамар авиабазаси илгари “Top Gun” фильми билан машҳур бўлган АҚШ Ҳарбий-денгиз кучлари учувчиларини тайёрлаш марказига мезбонлик қилган. 1996-йилда база Денгиз пиёдалари корпусига топширилгач, ўқув маркази Невада штатига кўчирилган.
АҚШ ҳукумати маълумотларига кўра, Денгиз пиёдалари корпуси, Ҳарбий-денгиз кучлари ва Ҳарбий-ҳаво кучлари тасарруфида 630 дан ортиқ F-35 қирувчи самолёти мавжуд.
Ҳалокатга учраган F-35B қисқа масофадан учиш ва вертикал қўниш имкониятига эга модификация ҳисобланади. Битта шундай самолётнинг қиймати тахминан 109 миллион долларни ташкил этади.
АҚШ Ҳисоб палатаси (GAO) ҳисоб-китобларига кўра, 1 800 дан ортиқ F-35 самолётини харид қилиш ва уларни ўнлаб йиллар давомида эксплуатация қилиш билан боғлиқ умумий дастур қиймати 2 триллион долларга яқинлашади.
