Дунёнинг энг баланд 14 чўққисини рекорд муддатда забт этган непаллик алпинист Нирмал Пуржа Покистондаги Броад-Пик тоғида юз берган қор кўчкиси оқибатида ҳалок бўлди. Фожиада яна тўққиз нафар алпинист ҳам ҳаётдан кўз юмган. Бу ҳақда Al-Jazeera хабар берди.
Пуржанинг Elite Exped экспедиция компанияси 2 август куни унинг вафот этганини тасдиқлади.
“Чуқур қайғу билан маълум қиламизки, Нирмал ‘Нимсдаи’ Пуржа Броад-Пикдаги қор кўчкиси оқибатида фожиали тарзда ҳаётдан кўз юмди. Экспедициянинг бошқа аъзолари ҳам омон қолмаганини тасдиқлаймиз”, дейилади компания баёнотида.
43 ёшли Пуржа Покистон шимолидаги 8 051 метр баландликдаги Броад-Пик чўққисига 10 кишилик гуруҳни бошлаб чиқаётган пайтда, 31 июль куни туш атрофида қор кўчкиси содир бўлган. Шундан сўнг алпинистлар бедарак йўқолган деб эълон қилинган.
Қидирув-қутқарув ишлари ёмон об-ҳаво ва тоғли ҳудуднинг мураккаблиги сабаб қийин кечган. Покистон расмийлари аввалига тўрт нафар алпинистнинг жасади топилгани, улардан учтаси олиб чиқилгани ҳақида хабар берган.
Ҳалок бўлганлар орасида непаллик алпинист Пур Баҳодур Гурунг, уммонлик алпинист Надҳира ал-Ҳарсий, америкалик алпинист Маллори Гейс борлиги тасдиқланган.
Экспедиция таркибида беш нафар непаллик, бир нафар уммонлик, бир нафар америкалик, покистонлик алпинист Соҳаил Сахи, хитойлик Ван исмли алпинист ва яна бир иштирокчи бўлган.
Нирмал Пуржа ким эди?
Британия армиясининг собиқ ҳарбийси бўлган Нирмал Пуржа алпинистлар орасида “Нимсдаи” номи билан машҳур эди.
У 2019-йилда дунёнинг 14 та саккиз минг метрдан баланд чўққисини атиги 189 кун ичида забт этиб, жаҳон рекордини ўрнатган. Ушбу тарихий ютуқ Netflix’нинг “14 чўққи: Ҳеч нарса имконсиз эмас” (14 Peaks: Nothing Is Impossible) ҳужжатли фильмида ҳам акс эттирилган. Унинг рекорди 2023-йилда янгиланган.
Непал бош вазири Балендра Шоҳ Пуржа ва бошқа алпинистларнинг ўлими муносабати билан ҳамдардлик билдириб, уларнинг жасорати ва алпинизм ривожига қўшган ҳиссаси доимо ёдда қолишини таъкидлади.
Броад-Пик дунёдаги энг мураккаб чўққилардан бири
Броад-Пик дунёдаги 12-энг баланд тоғ бўлиб, Покистоннинг Гилгит-Балтистон ҳудудида жойлашган. Мутахассислар уни мамлакатдаги энг мураккаб чўққилардан бири деб ҳисоблайди.
Бугунги кунга қадар дунёда атиги 30 нафардан сал кўпроқ алпинист Ер юзидаги барча 14 та саккиз минг метрдан баланд чўққини забт эта олган.
Ҳалок бўлган алпинистлар орасидаги Пур Баҳодур Гурунг Эверестга 10 марта муваффақиятли чиққан ва К2 чўққисини 24 соат ичида забт этгани билан танилган. Надҳира ал-Ҳарсий эса Эверест чўққисига чиққан илк уммонлик аёл, шунингдек К2 ни забт этган биринчи Уммон фуқароси бўлган.
Америкалик 39 ёшли Маллори Гейс учун эса Броад-Пик экспедицияси унинг Покистондаги саккиз минг метрлик чўққига илк уриниш эди. Йил бошида у алпинизм орзусини амалга ошириш учун ўзининг Пилатес студиясини ёпганини маълум қилган.
