Марказий банк талаблари ва ўтказилган инспекция текширувлари давомида, жиноий фаолиятдан олинган даромадларни легаллаштириш, терроризм ва оммавий қирғин қуролини тарқатишни молиялаштиришга қарши курашиш қоидаларига риоя қилинишида аниқланган қоидабузарликлар учун 3 та банк, 5 та микромолия ташкилоти ва 2 та тўлов ташкилотига нисбатан жарима санкцияси қўлланилди. Бу ҳақда Марказий банк хабар берди.
Қайд этилишича, пруденсиал норматив талабларига риоя этилмагани, ўз фаолиятини белгиланган тартибда қонунчилик ҳужжатлари талабларига мувофиқлаштирмагани ҳамда инспекция текширувлари давомида аниқланган камчиликлар учун 1 та банк ва 1 та тўлов ташкилоти чора ва санкциялар қўлланилиши мумкинлиги тўғрисида огоҳлантирилган.
Шунингдек, аниқланган қоидабузарликлар туфайли 13 ноябрдан бошлаб “TEZPAY” ва “NATIONAL PAY” акциядорлик жамиятларида олти ой муддатга тўлов хизматлари ва айрим турдаги операцияларни амалга ошириш, жумладан, электрон шаклдаги тўловларга ишлов бериш ва тўловни амалга ошириш учун зарур ахборотни банкка узатиш ёки мазкур тўловлар бўйича пул маблағларини қабул қилиш чеклаб қўйилган.
Мазкур акциядорлик жамиятлари ярим йил давомида пул ўтказмалари тизими орқали пул маблағларини қабул қилиш ва амалга ошириш имкониятларидан фойдалана олмайди.
