Ливия армияси Бош штаби бошлиғи Муҳаммад Али Аҳмад ал-Ҳаддод бўлган хусусий самолёт 23 декабрь куни Анқара яқинида қулаб тушди. Ҳодиса оқибатида ливиялик генерал ҳалок бўлди.
Ливия ҳукумати ўз ҳарбий қўмондони ҳалок бўлганини тасдиқлади. Туркия ички ишлар вазири Али Ерликая эса авиаҳалокат юзасидан баёнот берди.
“Анқарадаги Эсенбоға аэропортидан Триполи шаҳрига учган самолёт бўлаклари бизнинг ҳуқуқ-тартибот идоралари ходимлари томонидан Хайман районидаги Кесиккавак қишлоғидан 2 километр жанубда топилди”, деди Ерликая.
Falcon 50 самолёти билан алоқа тахминан 40 дақиқалик парвоздан сўнг йўқолган. Учоқ бортида Ливия Бош штаби бошлиғидан ташқари яна тўрт нафар йўловчи бор эди. Генералга унинг маслаҳатчиси Муҳаммад Ал-Асавий Диаб, қуруқликдаги қўшинлар штаби бошлиғи генерал-лейтенант Ал-Файтури Ғариб, бригада генерали Маҳмуд Ал-Кативи ва Бош штаб бошлиғи матбуот хизмати фотосуратчиси Муҳаммад Умар Аҳмад Маҳжуб ҳамроҳлик қилган.
“Бу оғир йўқотиш миллат, ҳарбий муассаса ва бутун халқ учун катта йўқотишдир”, деди Ливия бош вазири Абдул Ҳамид Дбейба.
Муҳаммад ал-Ҳаддод Ливия ғарбидаги армиянинг бош қўмондони эди. У бўлинган Ливия армиясини бирлаштириш учун давом этаётган уринишларда ҳал қилувчи рол ўйнаган.
Ливия генерали Туркия Бош штаби раҳбари Селчук Байроқтарўғлининг таклифига биноан Анқарага келган эди. У Туркия мудофаа вазири Яшар Гюлер билан учрашган. Ҳалокатга учраган самолёт Малтада жойлашган Harmony Jets компаниясига тегишли бўлган. Falcon 50 бизнес-жети учта двигатель билан жиҳозланган. У ҳавода 6,5 соат тура олади, парвоз масофаси эса 5800 километрни ташкил қилади. Самолёт ўн кишига мўлжалланган.
