2024-йилнинг декабрь ойида номи ошкор этилмаган мижоз Бразилиянинг Embraer компаниясидан бир жуфт C-390 Millennium ҳарбий-транспорт самолётларини сотиб олиши ҳақида хабарлар пайдо бўлганди. Жорий йилнинг 3 февраль куни Сингапурда ўтган авиашоуда компания буюртмачи Ўзбекистон эканини расман маълум қилди. Бу мамлакатни минтақанинг ушбу ҳаво кемасидан фойдаланадиган илк операторга айлантиради.
Компания маълумотига кўра, Ўзбекистон қуролли кучлари C-390 самолётларидан асосан ҳарбий-транспорт ва гуманитар миссияларда фойдаланади. Бу эса шахсий таркиб, техника ва инсонпарварлик юкларини узоқ масофаларга олиб бориш салоҳиятини мустаҳкамлайди. Шунингдек, мамлакатга эскириб бораётган Ил-76 Илюшин самолётлари паркини янгилаш имконини беради.
“Ўзбекистон Ҳарбий-ҳаво кучлари транспорт имкониятларини модернизация қилаётган бир пайтда, биз уларни C-390 Millennium операторлари сафига расман қабул қилдик. Марказий Осиёнинг етакчи мамлакатларидан бири бизнинг самолётни танлаганидан фахрланамиз ва ҳамкорлик алоқаларни келгусида ҳам давом эттирамиз”, деди компания президенти ва бош ижрочи директори Боско да Коста Жуниор.
Самолёт ҳақида
C-390 Millennium икки двигательли ҳарбий-транспорт самолёти бўлиб, асосан, юк ва шахсий таркибни ташиш, тиббий эвакуация ҳамда десант амалиётларида фойдаланилади. Бундан ташқари, уни ўрмон ёнғинларини ўчириш каби миссияларда ҳам қўлласа бўлади.
Самолётни ишлаб чиқариш 2018-йили бошланган бўлиб, ҳар бири, тахминан, 50-55 млн доллар туради. Ҳаво кемасини уч кишилик экипаж бошқаради. Максимал учиш оғирлиги 87 тоннани, максимал парвоз масофаси эса 6200 кмни ташкил қилади. Ишлаб чиқарувчига кўра, у асфалтланмаган учиш-қўниш йўлагидан ҳам ҳавога кўтарила олади. Бу самолётни ҳарбий ва фуқаровий ёрдам миссиялари учун мослашувчан платформага айлантиради.
C-390 Millennium операторлари орасида Ўзбекистондан ташқари Бразилия, Португалия, Венгрия, Жанубий Корея, Нидерландия, Австрия, Чехия, Швеция, Словакия ва Литва каби давлатлар бор. Ҳозирча буюртма қачон амалга оширилиши ҳақида маълумот йўқ.
