АҚШ Президенти Дональд Трамп маъмурияти мулозимлари нефть нархи 200 долларгача кўтарилганда, иқтисодиёт қандай ҳолатга тушишини ўрганмоқда. Бу ҳақда вазиятдан хабардор манбаларга таяниб, “Bloomberg” хабар берди.
Нашр суҳбатдошларининг айтишича, нефть нархи кескин кўтарилганда иқтисодий вазиятни моделлаштириш кескинлик даврида мунтазам равишда ўтказиб турилади ва бу прогноз ҳисобланмайди. Уларнинг сўзларига кўра, бу иш маъмуриятнинг барча эҳтимолий сценарийларга тайёр эканлигига ишонч ҳосил қилишга қаратилган.
“Яқин Шарқдаги уруш бошланишидан олдин ҳам Молия вазири Скотт Бессент можаро нефть нархининг ошишига олиб келишидан хавотир билдирган эди”, дейди манбалар.
Вазирлик ходимлари бир неча ҳафта давомида ўз хавотирларини Оқ уйга етказиб турган. Оқ уй вакили Куш Десаининг таъкидлашича, маъмурият доимо турли сценарийлар ва иқтисодий оқибатларни баҳолаб борса-да, нефть нархи 200 долларга етиши эҳтимолини кўриб чиқаётгани йўқ. Унинг сўзларига кўра, Бессент “Эпик ғазаб” (Epic Fury) операцияси оқибатидаги қисқа муддатли тебранишлардан “хавотирда” эмас.
“Bloomberg” қайд этишича, ҳатто бир неча ой давомида нархнинг 170 доллар атрофида бўлиши ҳам АҚШ ва Европада инфляциянинг ошишига ва иқтисодий ўсишнинг секинлашишига олиб келади. АҚШда аллақачон сезилаётган энг катта таъсир – бензин чакана нархларининг 30 фоизга ошиши бўлган.
