20 январь куни Наманган вилояти Ички ишлар бошқармаси, Давлат хавфсизлик хизмати ҳамда Косонсой тумани Ички ишлар бўлими тезкор ходимлари ҳамкорлигида ўтказилган тезкор-профилактик тадбирлар давомида давлат чегарасини ноқонуний кесиб ўтиш билан шуғулланиб келган жиноий гуруҳ фош этилди.
Аниқланишича, Косонсой тумани “Абдураҳмон Жомий” маҳалласида яшовчи шахс “Гулбоғ” ва “Чорбоғ” маҳаллаларида истиқомат қилувчи тўрт нафар таниши билан тил бириктириб, “Баҳористон” маҳалла фуқаролар йиғини ҳудуди орқали ўтувчи сўқмоқ йўлдан Қирғизистон билан давлат чегарасини сим тўсиқ тортилган қисмидан ноқонуний равишда бузиб ўтган. Улар Қирғизистоннинг Олабоқа тумани Баймоқ овулида яшовчи танишининг олдига бориб, қўйларни яширин йўл билан олиб ўтишни режалаштирган.
Томонлар ўзаро келиша олмагач, қирғизистонлик фуқаро қўйларни бермаслигини билдириб, уларни 20 январь куни қирғиз—ўзбек чегарасининг “Равот” маҳалла фуқаролар йиғини билан туташ ҳудудига олиб келиб, ортига қайтиб кетган. Шундан сўнг беш нафар қонунбузар давлат чегарасининг сим тўсиқ тортилган қисмини яна ноқонуний кесиб ўтган вақтида тезкор ходимлар ва чегара ҳарбийлари томонидан қўлга олинган.
Мазкур ҳолат юзасидан Косонсой тумани ички ишлар бўлими ҳузуридаги тергов бўлинмаси томонидан Жиноят кодексининг 223-моддаси (қонунга хилоф равишда чет элга чиқиш ёки Ўзбекистон Республикасига кириш) иккинчи қисми билан жиноят иши қўзғатилди. Ҳозирда мазкур жиноят иши бўйича дастлабки тергов ҳаракатлари олиб борилмоқда.
