Лондоннинг “Челси” клуби Роман Абрамович эгалиги даврида йўл қўйилган молиявий қоидабузарликлар сабабли Англия Премьер Лигаси томонидан жазоланди. Sky Sports нашрининг хабар беришича, мустақил комиссия клубни молиявий ҳисоботлар ва трансфер қоидаларини бузганликда айбдор деб топган.
Текширувлар натижасига кўра, “Челси” 10,75 миллион фунт миқдорида жаримага тортилди. Ушбу жазо 2011-йилдан 2018-йилгача бўлган даврда амалга оширилган махфий тўловлар, учинчи шахсларнинг инвестициялари ва ёш футболчиларнинг трансфери билан боғлиқ қонунбузарликлар учун қўлланилди.
Англия Премьер Лигаси томонидан клубга нисбатан қуйидаги чекловлар жорий этилди:
- Академия учун тақиқ: клубга 9 ой давомида академияга янги футболчиларни рўйхатдан ўтказиш тақиқланди.
- Асосий жамоа учун шартли тақиқ: асосий таркиб учун бир йиллик трансфер тақиқи белгиланди, бироқ у икки йиллик синов муддати билан шартли характерга эга. Агар клуб ушбу вақт ичида яна қоидабузарликка йўл қўймаса, тақиқ кучга кирмайди.
Маълум қилинишича, клуб хўжайини Тодд Боэли бошчилигидаги гуруҳ жамоани қабул қилиб олгач, ички текширув ўтказган. Текширув давомида Абрамович давридаги хатолар аниқланган ва янги раҳбарият бу ҳақда Англия Премьер Лигасига ўзи хабар берган. Айнан мана шу “ўз-ўзини ҳисобот қилиш” фактори жазо чораларининг бир оз юмшоқроқ бўлишига хизмат қилган.
Эслатиб ўтамиз, АПЛнинг 30-туридан сўнг “Челси” 48 очко жамғарган ҳолда турнир жадвалининг 6-поғонасида бормоқда. Жамоа еврокубоклар йўлланмаси учун курашни давом эттирмоқда.
